SHILLONG:
Ka mat jong ka Uniform Civil Code (UCC) ba la thmu da ka sorkar pdeng ban pyntrei ha ka ri baroh kawei, ka dei ka mat kaba la neh kham slem bad kaba la ioh ruh ka jingshah kynthoh na kiba bun khamtam ha ka ri India kaba don bun ki niam ki rukom, ki riti ki dustur, ki jaitbynriew bapher bapher, ki jaitktien bad kiwei kiwei ki jingïapher naduh ka riam ka beit, ka bam ka dih, ha kaba la tip ruh ïa ka ri India kum kawei na ki ri kaba riewspah namar kane ka jingdon jong ka ïa ki jaitbynriew bapher bapher.
Haba ïakren bad u President ka UDP, u Bah Metbah Lyngdoh u la ong ba kane ka mat ka dei kaba ïar bad kaba jylliew kumta ki hap ban ngam kham jylliew bad ki hap ban peit bniah bha shwa. “Mynta ngim pat lah ban ong kaei ka UCC, namar ngi hap ban ngam jylliew ha ki jingmut ba ïar jong ka, hynrei ka UCC ka thew ïa ka Civil Laws ymdei ïa ka Criminal Laws”, la bynrap u Bah Metbah.
U Bah Metbah u la ong ruh ba ka Civil Law ka thew ïa ka niam, ka jingïathoh shongkurim, ka jinghiar pateng, ka jingïapyllait tnga, ki jingdon jingem bad kiwei kiwei, kumta ki hap ban kham shai shwa halor kane shwa ba kin ong eiei.
