SHILLONG:
U Working President ka KHNAM u Bah Thomas Passah u la ong ba lyngba ka MDC election kam dei ka jingpynkhlaiñ ïa ka KHNAM hynrei kan pynkhlaiñ ïa ka bor ka itiar jong ka District Council .
“Ngim kwah ban ïakhun ïa ka ilekshon MDC ngi kwah ba pynkhlaiñ ïa ka itiar ka District Council , ban pyndonkam hok ïa ka bor jong ka khyrnit ba hynriew jong ka riti shynshar”, u la ong u bah Passah sha ki ladpathai khubor .
“Ngin pynkylla khongpong ïa ka District Council, namar kumba ka long mynta ka jingtreikam ki District Council hapdeng ki Karbi Along Autonomous bad Khasi Autonomous mano ba kham nang ban pyntrei kam ia ka 6th Schedule ki jong ngi kim tip”, u la ong .
“Na kane ka daw ba ngi khlem kwah ban pynïeng ïa ka kyrtong MLA, mynta ki District Council la 51 snem naduh u snem 1972 haduh mynta don tang ka wei ka aiñ ba la thaw bad tang uwei u nongthaw aiñ, kata u Bah H.S Shylla, kiwei ki MDC ki jah shano ?”u la bynrap.
“ Ngi kwah ban pynthikna ba ka District Council kan khlain, ngi khlem kwah ban ïakhun ïa ka ilekshon MLA, khnang ba ka lyngba ki MDC ngin lah ban trei kylluid namar ngim donkam shuh ïa ka sorkar namar ngim don MLA, ka KHNAM kan long kum ka Autonomous”, u la ong shuh shuh .
U Bah Passah u la ong shuh shuh ba “Ka jingmih ka Voice of People Party (VPP) kan ym ktah ïa ka KHNAM namar ngi don la ka jong ka nongrim, ngi buh ïa kawei ka bynta lada ngi ïakhun election ba ngim dei ban tieng ban rem, namar ki ong ba ka KHNAM ka kum ka seng sain pyrthei hynrei kum ka movement ka dei ka ba khlaiñ namar ka ju kren bad trei baroh 5 snem ïa ki mat ki jura ka Ri bad ka Jaidbynriew” .
“Ngi kmen ïa ka jingmih ka VPP namar ka ïa syriem ia ka rukom treikam bad ka KHNAM bad kan dei ban ïalad lang ïa baroh”. u la bynrap
