SHILLONG:
U Bah Ardent Miller Basaiawmoit, u President ka Voice of People Party (VPP), u la ong ba kum ka party ka pdiang ka jingthmu jong ka sorkar ban sdang biang ïa ka jingthungkam ha ka jylla hadien ba ka la rai ban pynkylla thymmai ïa ka Office Memorandum (OM) jong u snem 2022.
Ha ba kren sha ki ladpathai khubor, u Bah Ardent Miller Basaiawmoit u la ong ba ka sorkar ka la pynsangeh ïa ka jingthungkam kum ba ka VPP ka la dawa, hynrei ka VPP ka pdiang ïa ka jingthmu jong ka sorkar ban sdang biang ïa ka jingthungkam thungjam ha ka jylla namar na ka la rai ban pynkylla tymmai shwa ïa ka Office Memorandum 2022.
“Kane ka rai jong ka sorkar ban pynkylla thymmai ïa ka Office Memorandum 2022, kan dei ka office memorandum ka ban ym long shuh kum ha kine ki shi snem ar snem, ki ba u samla wad kam ki mad mad ïa ka jinglehshiliang”u la ong .
U la bynrap shuh shuh, “Ngi ngeit ba ka sorkar kan leh ïa kaba dei bad ka VPP kam kwah ban pyrkhat sniew halor kane ka bynta namar ngi la dep ban pynsngew sha ka sorkar, bad ngi sngewthuh ba ban pynsangeh sah ïa ka jingthungkam kan ym long ka ba suk”.
U Bah Ardent u la ong shuh shuh, “Ka sorkar ka la dep ban pynkylla thymmai ïa ka Office Memorandom bad ngi kyrmen ba kin wanrah da ka OM ka ban lah ban pynbeit ïa kata ka jingeh kiba la mih ha kine ki shisnem ar snem”.
Halor ka jingthaw ka sorkar ïa ka Search Committee, u Bah Ardent u la ong, “Nga ai khublei ïa ka sorkar, ba ka la pyntyllun ïa ka kam shakhmat bad thung ïa ka Search Committee hapoh ka jingïalam u Chief Secreatary ban wad ïa ki riewshemphang (Expert) kumba la pynpaw ha ki notification. Nga ngeit bad shaniah ha ka jingstad u Chief Secreatary”.
Halor ka jingkynthoh ba ki Committee ki ju kut tang ha Committee bad kim ju seisoh u Bah Ardent u la ong, “Ha kane ka khep mynta kane ka Expert Committee, kan ym kut kumta, ka don ka jingngeit ka ba skem bad ka VPP kan dang buddien, ïai pynsngewthuh ban pynshai ïa ki paidbah ba ngi donkam ban iohi ba kane ka Committee ka shim ïa ka sienjam ka ba sted ban ai jingmut sha ka sorkar bad ba ka sorkar kan pyntreikam ïa ki jingai jingmut ki ba shongnia da kane ka Committee”.
U la bynrap shuh shuh “Na ka liang ka VPP, halor ka ne ka bynta kan kan ym ap haduh ba ka sorkar kan khot, hynrei ka VPP kan sa leit ban ai ka jingthoh sha ka sorkar, ban kyntu ïa ka sorkar ban pynsted ïa ka jingtreikam ka Expert Committee”.
