SHILLONG:
Ka Butcher Association of Meghalaya (BAM), ha ka 22 tarik Jylliew, ki la pyntip ba naduh mynta ka sngi ka 23 tarik Jylliew, kin sangeh shwa ban die ïa ka doh masi, na ka bynta shipor katba ym pat lah ban tehlakam ïa ka jinglong jingman halor ka jingpang Lumpy Skin Disease (LSD) ka ba la lynshop ha ka jylla.
Haba ïakren bad ki ladpathai khubor na ka liang u Bah Erson Marwein, u President ka Butcher Association of Meghalaya u la ïathuh ba ha ka jingïalang ba la pynlong mynta ka sngi hapdeng ki nongdiedoh bad ka Butcher Association of Meghalaya hadien ba la ïathir bha ia baroh ki jingeh ki ba ki la mad ha kine ki sngi hadien ba ka Lumpy Skin Disease ka la wan lynshop ïa ka jylla, ki la shim ïa ka rai ban sangeh shwa ïa ka jingdie ia ka doh masi kane ka long ban wanrah biang ïa ka jingshngaiñ bad ka jingsuk mynsiem ïa u paidbah ban thied biang ïa ka doh masi.
“Ha kane ka sngi ngi la ïakren, bad shim rai ym tang ban myntoi ïalade shimet hynrei ngin hap ban pyrkhat ruh ïa u paidbah u ba bam ïa ka doh masi, ka ba ngi die man ka sngi, kumta da ka wei ka sur ngi la shim ïa ka rai ban sangeh shwa shipor ïa ka kam otdoh masi khnang ba kane ka jingtieng bad ka jingartatien jong u paidbah ban thied dohmasi kan jah noh”, u la ong.
“Kumba ka long mynta ki paidbah ki don hapdeng ka jingbym sngewthuh sngewthaw namar haba phai sha ki jingkren jong ki Myntri Sorkar kum ka Dr Ampareen Lyngdoh bad u Symbud Myntri Rangbah ka jylla u Bah Prestone Tynsong ki ba la ai ka kyrwoh ba kim khang ïa ka jingdie doh hynrei ki kyntu ruh ïa ki paidbah ba kin husiar ban thied ïa ka doh kane ka la buh ka jingartatien ïa ki paidbah ban thied dohmasi, kumta ngi la rai ba naduh 23 tarik Jylliew, ngin sangeh shwa ka jingdie doh masi ha ka jylla”, u la ong.
U la bynrap shuh shuh, “Kane ka rai kam dei ka ba la shu pynbor da mano mano hynrei da ka jingiamynjur lang jong baroh ki nongdie doh, ngi kwah ban iakhun ym ia ka sorkar hynrei ia ka jingartatiren jong ki paidbah, ki ba mynta ki don hapdeng ka jingartatien ban thied ia ka doh masi”.
U la ong shuh shuh, “Ngi la shim ïa kane ka sienjan khnang ba ynda la plie biang ka jingdie doh ki paidbah ruh kin ym artatien shuh ban thied ïa ka dohmasi, bad kin thied da ka ba jingsuk mynsiem, namar mynta ka dang khluid bha ka ne ka jingartatien jong u paidbah. Ka Association kan ym buh por lano kan plie biang, hynrei ngin sa shim rai katkum ka jinglong jingman”. Haba kylli u la ong, “Katkum ka jingong ki Joint Director ka tnad, u la batai ba kane ka dei ka jingpang ka ba lah ban ïabit para mrad, kumta la kyrpad ïa baroh ki nongkhaïi masi ki ba ju wanrah masi sha ka jylla ba kin sangeh wanrah ïa ki masi mynta shipor namar ba kane ka lah ban don ka jingktah”.
