SHILLONG:
U nongai ktien jong ka MDA, u Bah Paul Lyngdoh ha ka sngi saitjaiñ, u la kyrpad ïa ki nongtrei ASHA ba kin wan shakhmat ban ïakren halor ki mat jingeh bad ka sorkar.
“Naba kane ka dei shaphang jong ki, hynrei ngam tip ba balei ki (ASHA) ki hap leit sha surok bad pynpaw ïa ka jingsngew jong ki. Te ai ïa ki ba kin ïakynduh ïa ki Myntri bad ïakren halor ki jingeh,” ong u Paul ha ki nongthoh kot khubor.
Utei u Myntri sorkar u la ong ha ka jingshisha ka jylla Meghalaya ka la leh ïa kaba bha na ka bynta ki nongtrei ASHA da kaba pynbiang ïa ki jingsiew jong ki, haba la pynïa nujor bad kiwei pat ki jylla North East.
“Naduh ba la pynbiang ïa ka jingsiew, la khmih lynti ba ki nongtrei ASHA kin siew kylliang ïangi da ka jingai jingïaroh (sha ka sorkar),” ong u Paul. U la bynrap da kaba ong, “Ka long ka jinglong jong ngi ki briew ban khmih lynti shibun hynrei don u pud ïa kiei baroh.”
U Paul u la ong ba ka Myntri ka koit ka khiah, ka Ampareen Lyngdoh ka la dep pynthikna ïa ki ban kynduh ïa ki nongtrei ASHA. Ki jaka ai jingsumar jong ka koit ka khiah ki la kulmar lut ha ki 7000 tylli ki shnong, hadien ba ki nongtrei ASHA ki la pynlong ïa ka indefinite strike ha kine ki khatar sngi ba la dep, pyrshah ïa ka jingpulom ka sorkar ban siew ïa ki ïa ka pisa haduh T. 5,000.
