SHILLONG:
Ka Khasi Students Union (KSU), ha ka 16 tarik Jylliew ka la pan jingpynshai na u Dean jong ka College of Agriculture ha Kyrdemkulai, hadien ba 7 ngut ki nongtrei jong ka Central Agricultural University Imphal ki la shah pynkynriah noh (transfer) sha ka College of Agriculture ha Kyrdemkulai ha ka taïew ba la dep.
Haba kren sha ki lad pathai khubor, u Dean jong ka College u Shri. JK Behara u la ong, “Ki don hynñiew ngut ki nongtrei kiba la pynkynriah kam noh na Manipur na ka daw jong ka jinglong jingman ha Manipur, bad kine ki nongtrei ki don hapoh ka jingïateh kontrak kaba 3 bnai bad ha kaba kut jong kine ki lai bnai kin sa leit trei biang sha Imphal.”
U Dean u la pynthikna ruh ba ki kam ba la mang na ka bynta ki trai shnong yn ieh na ka bynta jong ki hi bad ba ki nongtrei ba la pynkynriah kam na Imphal kin ym shim noh ïa ki kam ba la mang kyrpang na ka bynta ki trai shnong.
Ha kawei pat ka liang, u Education Secretary ka KSU North Khasi Hills District Unit, u samla Banjop Maring, u la ong, “Ka seng ka pan jingpynshai halor ar tylli ki bynta – kawei ka long la kine ki nongtrei ba la pynkynriah kam na Imphal ki wan hangne bad ka ïing ka sem jong ki lane tang ma ki hi, ïa kaba u Dean u la pyntip ïa ngi ba tang ki nongtrei ki la wan shane. Kaba ar ka long ba namar ha u snem 2019 ka la don ka advertisement na ka bynta 8 tylli ki kam kiba thylli hynrei haduh mynta ym pat pynlong ïa ka interview, bad ngi tieng ïoh ba kine ki kam ba la mang na ka bynta jong ngi ki trai shnong la ai noh sha kine ki 7 ngut ki nongtrei ba la pynkynriah kam na Manipur. Hynrei u Dean u la pynthikna ha ngi ba kine ki nongtrei ki dei kiba wan trei tang shipor bad ba kan don ka interview na ka bynta kine ki kam.”
Ha kane ka jingïakynduh, u Dean jong ka College u la ong, “Namar ka jingwan u COVID, yn shym la lah ban pynlong ïa ka interview na ka bynta ki kam ba la ai advertisement, bad namar ba ka la kot san snem kine ki kam ki la kut noh, kumta ngi la phah ka jingkyrpad ban mang shuh shuh kham bun ki kam bad shen kan sa don ka advertisement.”
U la ong ruh ba ka tulop jong ki nongtrei ba la pynkynriah kam na Manipur la shim na ka Central Agricultural University Imphal namar ki dei ki nongtrei jong ka kiba la pynkynriah kam shipor.
