SHILLONG:
Ki san tylli ki sengbhalang, kiba kynthup ïa ka HYC, HANM, JSM, EJNC bad ka CORP, kiba don hapoh ka lama jong ka ‘Save Hynñiewtrep Mission’, mynta ka sngi ki la dawa na u Chief Executive Member (CEM) jong ka Jaiñtia Hills Autonomous District Council (JHADC) ba u dei ban pynrem bad ban pynshai ïa ka jingthoh jong u CEM ka Karbi Anglong Autonomous Council (KAAC), halor ka jingshah siat ïap ki briew ha ka shnong Mukroh, West Jaiñtia Hills District, ha ka step jong ka 22 tarik, Naiwieng.
Kine ki san seng ki la ong ba u Tuliram Ronghang uba dei u CEM jong ka KAAC, u la thoh ha ki rynsan ‘social media’, da kaba kam ba ki Khasi ki dei kiba shu shong beaiñ ha ka shnong Mukroh. Ka ‘Save Hynñiewtrep Mission’, ka la ong ba katei ka jingthoh jong u Ronghang ka mut ba ki Khasi Pnar kiba shong ha ka shnong Mukroh, ne ‘lehse kito ruh kiba shong ha Psiar, Khanduli, bad ha Block 1, ki long kita ki poiwir’.
Ka SHM ka la pynrem jur ïa kane ka jingthoh u Ronghang bad ka la ong ba une u briew um don jingtip ei ei shaphang ki pud ki sam bad shaphang ki jingthoh jong ki mynbarim kiba ïadei bad kine ki shnong. Ka SHM ka la ong, “ngim dei ban klet ba ka KAAC ka dang mih hadien ka snem 1952 bad ki briew na ka jaitbynriew Khasi bad Pnar ki la shong shnong ha ki thaiñ Mukroh, Psiar, Khanduli bad Block 1 (Labang Nongphyllut) da ki spah snem mynshuwa bad ki jaitbynriew Khasi Pnar ha kine ki thaiñ ki dei ki trai jaka, trai muluk bad ki trai khyndew, trai shyiap. Ki Khasi Pnar kim dei ki poiwir bad kim dei ki nongshong shnong beaiñ kumba la thoh u CEM ka KAAC.”
Ka SHM ka dawa na u CEM ka JHADC ba u dei ban pynrem ïa kane ka jingthoh jong u Ronghang bad ba u dei ban shimkhia ban ïada ïa ka khyndew ka shyiap bad ïa u pud u sam jong ki shnong bad ki Elaka kiba hap hapoh jong ka JHADC, ‘khlem kano kano ka jingpyndem’. Ka SHM ka la dawa ruh ba ka sorkar kan pynbeit noh ïa u pud u sam hapdeng ka jylla Meghalaya bad jylla Assam, da kaba pynshong nongrim na ki map bad ki kot, ki sla jong ki shnong bad ki Elaka kiba hap hapoh jong ka JHADC.
Ka la ong ruh ba na ka liang jong ka, ka la kloi ban ai ka jingkyrshan ba radbah ïa ka sorkar khamtam ïa ka JHADC ha kaba ïadei bad kane ka jingpynbeit ïa ki pud ki sam ha kine ki thaiñ khappud.
