SHILLONG:
U Chief Executive Member (CEM) ka Khasi Hills Autonomous District Council (KHADC) u Bah Titosstarwell Chyne, u la kyntu ïa ka kynhun jong ka Syngkhong Rympei Thymmai (SRT) ba kan pynshai sha ka Council halor ka jingkheiñ kur jong ki lada ki shim jait na u kpa.
Lah ban kdew hangne ba ki dkhot jong ka Syngkhong Rympei Thymmai (SRT) ki la wan ban pynpaw ïa ka jingpyrshah jur ïa ka jingpynmih hukum ka Khasi Hills Autonomous District Council (KHADC) ban pynduh ai syrnot Schedule Tribe ïa ki khun kiba ai jait kpa.
Ha ba kren bad u Kynjatshai, u Bah Chyne u la ïathuh, “Ha ka jingshisha na ka liang ka Council kam lah ban ong ba ki briew ki ba pan syrnot ki dei ki Khasi ne em lada ki shim jait na u kpa, hynrei katkum ka riti dustur ka jongngi ka long ba ngi shim jait na ka kmie bad ka District Council ka dei ka shlem ka ban pynneh ïa ka riti dustur u Khasi kumta ngi ïeng ha kane ka nongrim bad ngim kwah ban pynkylla ïa kane ka dustur kumba ka long”.
“Lada ngi shim jait na u kpa ka riti dustur jong ngi, ïa ka kmie u kpa ki ju ong ka meikha,bad ïa ka kmie jong ka kmie ki ong ka meiieid, hynrei lada ngi shim jait na u kpa ki khun jong nga kin ong meikha ngin khot kumno lada ïathir ïa kata ka rukom ïakheiñ jait kheiñ kur ha ngi u Khasi kan wanrah ïa ka jingbakla ka ba jur bha bad ka lah ban wanrah ruh ïa ka shongsang hadien ha bud bad dei na ka ne ka daw ba ngim kwah ban pynkylla ïa kane ka dustur namar kane ka shim jait ka dei ka ba la buh ryntih bad ngim kwah ban pynkylla da kumwei pat”, u la ong.
“Hynrei ki ba shim jait na u kpa ka Council kam khang, hynrei kan dei ka mon jong ki shimet, tangba pynshai lang ïa ngi, haba phi shim jait na u kpa kaei ka rukom kheiñ kur kheiñ kha jong ki namar ngi u Khasi ngi don la ka jong ka nguh meikha, la ka jong ka rukom kheiñ kñi”, u la bynrap.
U Bah Titos u la ong shuh shuh, “Lada ai jait ïa u kpa ïa u para jong nga kin kheiñ kñi ne pakhynnah namar ki shim jait na u kpa kata kim dei ban pynkulmar ïa ka rukom kheiñ kur jong ngi nga ïohi ïa ka rukom pyrshah ki dei ban wanrah kaei ka lynti kaba ki don lada ki ong ba ki donhok ban shim jait na u kpa ban ym pynkulmar ïa ka jaitbynriew baroh kawei namar ka rukom leh jong ki shimet kan pynkulmar ïa ka jaitbynriew lada kam pynkulmar wanrah sha ngi bad hadien ha bud lada ka biang ka lah ban don da ka wei pat ka aiñ na ka bynta jong ki”.
“Ngi hangne ngim pynkylla ïa ka riti dustur, lada ki ong dei ban shim jait na u kpa ka biang te kan bha ba kin wan pynshai kaei ka rukom kheiñ kur jong ki”, u la bynrap shuh shuh.
