MAWKYRWAT:
Hynnin ka jan miet jong ka sngi u Blei myn ha ka 21 tarik Kyllalyngkot 2024, ka Khasi Hills Students Union KSU Mawkyrwat Circle ha ryngkat ka Synjuk Seng Samla Shnong (SSSS) ki la pdiang sngew bha ïa ki samla jong ka District kiba la wan poi na nongbah Tura sha Mawkyrwat na ka bynta ban leit ïa shim bynta haka 5th Meghalaya Games kaba la long ha nongbah Tura ha kaba ka KSU ka la pynpaw ka jingsngew kmen shi kat dei ïa ki rang bad ki thei ïalehkai ba ki la ïalehkai bha ha ki jingïalehkai bapher bapher jong ha kaba ki la ïoh ban khur shibun ki medal, ha kaba ki la ïoh ban khur 16 tylli ki Gold Medal, 18 tylli ki Silvers Medal, bad brown 18 tylli, baroh ki khusnam ki long 52 tylli.
Ka KSU bad ka SSSS haba ai jingkren ha kane ka miet ki la ong ba ki la dap da ka jingsngew sarong ïa ki samla jong ka District kiba lah ïoh bun ki Medal ha kane ka kynti kaba mynta ban ïa thew ha ki snem kiba ladep ka jinglehkai bha jong ki samla ka la long ka burom ïa ka dong ka thaiñ baroh kawei.Haba ai jingkren u Bah Moonlyrooi Lyngdoh uba dei u Assistant Secretary jong ka SSSS u la kyntu kynpham ïa ki samla ba kin nang ïai pynkhreh shuh shuh khnang ba ha ka Meghalaya Games ka ban wan kin nangwan rah shuh shuh kham bun shah ban ïa une u snem 2024 bad kyrmen skhem ba kan long ka burom ym tang ïa ki shimet hynrei ïa ka ïing ka sem bad ïa ka District hi baroh kawei.
