NONGSTOIÑ:
Hadien ba kila mih shibun ki jingkynthoh halor ka rukom pynïaid ïa ka screening na ka bynta ban jied ïa ki khynnah skul ban ïoh ïashim bynta sha ka lympung Subroto Cup ha WKH, ka District Sport Officer (DSO) ka Kong B. Syiem kala ai jingpynshai sha ki lad pathai khubor halor kitei ki jingshah kynthoh.
Ha ka jingïakynduh ïa ki lad pathai khubor ha ka 23 tarik Jylliew hapoh ka ophis treikam jong ka ha Nongstoiñ ka Kong B. Syiem ka la pdiang ba ka jingjied ïa ki khynnah kala shimpor ban dep namar ka jingbun ki skul ba wan bad ka jingjied khambun ruh ïa ki khynnah na kawei ka team bad nalor kata ka jingkyrpad na ki skul ba dei peit ban pyndep ïa ka screening ha katei ka sngi.
Halor ka jingkynthoh leh shiliang khmat ban jied ïa ki khynnah bad ka jingïadon bynta ka coach jong ki skul ha ka screening committee ka DSO ka la kyntait war ïa kine ki jingkynthoh bad ka la ong ruh ba ka jingjied kam shym la don ka jingleh shiliang bad kim shym la don ruh ki dkhot ka screening committee kiba leit coach ïa ki skul.
Shuh shuh ka DSO kala ong ruh ba ha ka jingleh screening la lap ba bun kiba wanrah da ki birth certificate thok kumta na ka liang jong ka ophis bad tehlakam ïa ki jingleh thok ka la pynshisha ruh lyngba kiwei de ki jingpynshisha ïa u snem kha kum u aadhar bad kiwei de ki kot bad ïa ki bym thikna la phah beit sha u Doctor u ban shim ïa ka rai kaba khatduh.
