SHILLONG:
Ka ïing dorbar jong ka KHADC myn ha ka 20 tarik Nohprah 2023, ka la pdiang ïa ka Official Resolution ban dawa na ka Sorkar Pdeng ban pynkylla (Amend) ïa ka Constitution (Scheduled Tribes) Order, 1950 kane ka long ban khanglad ïa kiwei ki riewlum na kiwei ki jylla kiba ïoh jingithuh Schedule Tribes (ST) ban ïoh jingmyntoi kum ki trai jylla.
Ha ka dorbar tlang jong ka KHADC kaba la sdang myn ha ka 20 tarik Nohprah na ka liang ki MDC na baroh ar liang ki la pynpaw ïa ka jingsngewkhia ba kiwei ki riewlum na kiwei ki jylla, ha jylla Meghalaya ki ïoh ki juh ki jingmyntoi kumba ïoh ki trai jylla lyngba ka jingïoh syrnod Schedule Tribes (ST).
Haba ïadei bad kane u Chief Executive Member (CEM) ka KHADC u Bah Pyniaid Sing Syiem ha kane ka sngi u la wanrah da ka Official Resolution ban dawa na ka Sorkar Pdeng ban pynkylla (Amend) ïa ka Presidential Order 1950.
U la ong, “Ka jingthmu ban wanrah ïa kane ka resolution ka long hadien ba ïohi ïa ka jinglong jingman hapoh ka Ri Khasi, ha kaba ïadei bad ka jingïoh jingmyntoi kiwei pat ki riewlum na shatei lam mihngi na ka ST Status na Meghalaya, haba leit pat sha kiwei ki jylla ki trai jylla Meghalaya kim ïoh ïa ka jingmyntoi kum ba ïoh kiwei ki riewlum ha ka jylla jong ngi bad kane ka long ka jingduhnong ha baroh ki liang.”
“Kumta ngi donkam ban wanrah noh da ka Resolution ban kyntu na ka Sorkar jylla ba ka dei ban shim khia ban pynsngew sha ka sorkar India ban wan rah noh ïa ka jingpynkylla ha ka Constitution (Scheduled Tribes) Order, 1950, da kaba ithuh noh thik tang ki trai paid riewlum kum ki Scheduled Tribe ha Meghalaya,” u la ong.
Haba kyrshan ïa kane ka Resolution, u Nongïalam ka Liang Pyrshah u Bah Titosstarwel Chyne u la ong ba ha ka jingshisha ma u ruh ula dep ban aiti ïa ka Private Member Resolution halor kane kajuh ka kam ha ka 4 tarik u Nohprah, u la ai khublei ïa ka EC kaba la sngewthuh ïa ka jinglong kongsan kane ka Resolution bad ban wanrah ïa ka mynta ka sngi hapoh ka Ïingdorbar ban ïoh ïatai bad ai jingmynjur.
U Bah Titos ula ong ba kane ka Resolution ka long kaba kongsan bha bad ka dei ka jingkyrsiew thiah ïa baroh ba kin ïeng ïada ïa ka khyndew ka shyiap bad ki nongshong shnong. Ka jingthmu jong kane ka Resolution ka long ban kdew ïa ka jingshisha ba ki la don bun bha ki paid riewlum (kat kum ka thup ST) kiba ïoh ïa ki juh ki jingmyntoi kumba ïoh ki trai paid riewlum jong ka jylla”.
“Ka jingsngewkhia jong nga ka long ba kine ki riewlum na kiwei ki jylla, ki lah ban thied jaka katba ki mon ha ka jylla Meghalaya hynrei ki nong Meghalaya pat kim lah ban thied jaka ha ki jylla jong ki,” u la bynrap.
Halor kane ka Resolution la ïashim bynta lang ban ïatai da ki MDC kiba kynthup ïa u Bah Ronnie V Lyngdoh, u Bah Bajop Pyngrope, u Bah PN Syiem, u Bah Jambor War, u Bah Latiplang Kharkongor bad kiwei kiwei .
