SHILLONG:
Ki nongïalam jong ka Voice of the People Party (VPP) ki la pdiang ïa ka jingkhot jong ka Sorkar jylla, ha ka jingïalang jong baroh ki sengsainpyrthei, ka ban long ha ka 31 tarik jymmang na ka bynta ban ïatai ïa thir halor ka reservation policy ïa kane la pyntip da u MLA ka VPP, u Bah Brightstarwell Marbaniang mynta ka sngi.
Ha ba kren sha ki paidbah u Bah Brightstarwell Marbaniang, u la ong ba hapdeng kane ka jingïakhih, ka VPP ka dap da ka jingkmen ban ïohi ba ki khun samla ha ka Ri Khasi Jaintia, ki mih ryntih ban kyrshan ïa kane ka jingïakhun jong ka party.
“Mynta ka sngi ka party ka la ïoh ban pdiang ïa ka shithi na ka Sorkar ,halor ban lum ban lang ïa ka seng sainpyrthei baroh ban pynlong ïa ka jingïalang na ka bynta ban ïa kren halor ka jingpyntreikam ïa ka roster system, bad kynthup ruh ïa ka jingïatai halor ka reservation Policy”u la ong.
“Kumba ka VPP bad u president rangbah ka party u Bah Ardent Miller Basaiawmoit, u la pynpaw naduh nyngkong ki sngi ba lada, ka sorkar kam treh ban kren halor ka reservation policy, ka VPP kan ym treh ban don bynta ha kata ka committee, lane ha kano kano ka jingïakren, bad mynta ka long ka jingjop na ka bynta u paidbah ka bri u Hynniewtrep ba ka sorkar ka la khot lashai ka sngi, kata ka 31 tarik ban don ka jingïakren halor ka reservation Policy”, u la bynrap.
“Ngi sngewkmen ba ka Sorkar ka la pdiang ban ïa kren halor ka reservation policy, hynrei nga kwah ban pyntip, ba ka VPP bad u president ngin leit ban shim bynta ha kane ka jingïalang ka ban long lashai ka sngi, hynrei kane ka jingïakhih shah thngan kan bteng bad lada ka jingïakren kam long kumba ngi kwah ban pynbeit ïa ka reservation policy kane ka jingïakhih kan dang bteng” la ong u MLA ka mawlai Constituency.
U Bah Marbaniang u la ong shuh shuh ba “ Nga pynpaw ka jingsngewkmen halor ka jingwan ki paidbah kylleng ban ai ka jingkyrshan ba pura ha kane ka sngi ba mynta namar ngi mih shakhmat na ka bynta ka lawei jong iwei pa iwei ki khun samla bad ngin don ha syndah u paidbah”.
“Na duh ba ngi la rai ban mih shakhamt, ka thong jong ngi ka long ban don ha syndah u paidbah bad u paidbah ruh kin ym ieh ïa ngi, bad kin don ha syndah jong ngi , ban ïa treilang na ka bynta ka lawei ki pateng ki khun samla jong ngi”u la bynrap .
