NONGPOH:
Ki riew rangbah ka thaiñ Ri Bhoi Sepngi ha ryngkat ki nongïalam ka Patharkhmah Civil Sub-division Demanding Committee (PSDDC), ha ka 9 tarik Nohprah ki la pdiang ha ryngkat ka jingpynkup burom ïa u Bah BJ Kharshandi, uba dei kum u Sub-Divisional Officer ba nyngkong jong ka Patharkhmah Civil Sub-division, kata naduh ba la plie paidbah ha ka 2 tarik mynta u bnai.
Ha katei ka sngi kaba la pdiang burom ïa utei u SDO ba thymmai jong katei ka Civil Sub-division, la sakhi da ka jingdon shibun bun ngut ki riew rangbah jong katei ka thaiñ bad kumjuh ruh da ka jingdon ki nongkitkam ka NPP Jirang Block.
Haba pdiang bad pynkup burom ia utei u SDO ba thymmai jong katei ka Civil Sub-division, kitei ki riew rangbah ki la ai da ki jingai sngewbha bad ka jingpynkup burom da ka jaiñ ryndia, kaba long ruh kum shibynta ban ai mynsiem ïa utei u SDO ba un nanglah shuh shuh ban trei bha na bynta ki shnong kiba don ha katei ka thain bad ka ban long ka jingmyntoi ïa ki paidbah ha katei ka thaiñ hi baroh kawei.
