SHILLONG:
Ka North East Indigenous People’s Forum (NEIPF) ka la phah shithi sha u myntri rangbah ka jylla Assam, u Himanta Biswa Sarma ban sei madan ïa ka kaiphod jingtohkit na ka tnad tohkit ka sorkar pdeng halor ka jingshah siat ïap ki 6 ngut kynthup 5 ki nongshong shnong ka Meghalaya ha ki Pulit ka Assam.
Lah ban pynkynmaw ba ha ka 22 tarik u Naiwieng, 2022, ki 5 ngut ki la shah siat ïap ha ki Pulit ka Assam ha Mukroh, West Jaiñtia Hills.
Ka seng NEIPF ka pdiang ïa ka jingkloi ka sorkar Assam ban shim ïa kane ka lynti ban pynlong da ka jingtohkit lyngba ka tnad tohkit ka sorkar pdeng.
Ka seng ka la pynrem jur ruh ïa kine ki Pulit ka Assam kiba la siat ïa ki nongshong shnong kiba lui lui bad ka la kyntu ïa kane ka sorkar ban shim khia khnang ba ka jingim kiba lui lui kin ym long kita ki lanot shah pynïap tang na ka daw ka jingïakajia pud hapdeng ki artylli ki jylla kata ka jylla Meghalaya bad Assam.
