SHILLONG:
U MLA ka Nongkrem Constituency u bah Lambor Malngiang u la buh jingkylli ïa ki pulit ka jylla la kila khot hajir ne em ïa kito ki pulit Assam kiba don kti ban shim ïa ka jingim jong ki san ngut ki nongshong shnong ka Mukroh kaba la jia ha ka 22 tarik u Naiwieng.
“ Mynta ka sngi ka dei ka sngi kaba phra naduh bala ujor ejahar pyrshah ïa ki. Hato kila khot hajir ne em ban kylli jingkylli halor kato ka jingjia,” buh jingkylli u bah Lambor Malngiang.
U la bynrap da kaba ong, lada ïa kane kim pat leh, ka sorkar Meghalaya ka dei ban leh noh kloi ban khot ïa ki pulit ka Assam ban wan hajir sha ki bor jong ka Meghalaya.
Haba ïadei bad ka jingdawa ban don ka kynhun tohkit haba ïadei bad kane ka jingjia, u bah Malgniang u la ong ban ïa kaba phah tohkit ha ka CBI kan bha lada ngin aiti ha ka National Investigation Agency (NIA) ban leh ïa kane ka bynta.
“Lada ka CBI kan tohkit halor kane ka jingjia, lai ne saw snem kam pat biang na ka bynta jong ki ban pyndep. Lada ngi shim khiah kan bha ba ka NIA kan shimti ban tohkit ïa kane ka jingjia,” u la ong.
Haba ïadei bad ka border outpost kaba ka sorkar jylla kala thmu ban buh ha ki hynñiew tylli ki jaka , na ka liang u MLA ka Nongkrem u kwah ban shai haba ïadei bad ka Block II – ha kaba ïa ka jaka ym pat lah ban tip kan dei hamar haei, ha kaba u la buh jingkylli la ka jingïoh ïa ka jaka kan pynslem shuh shuh bad kan shim por.
U la ong ruh ba lada ka sorkar ka thmu ban buh ïa kine ki border outpost, kim dei ban long kiba tang shipor bad ban peit ba ïa ki pulit dei ban aibor ban ai jingïada ïa ki paidbah nongshong shnong ha khappud khlem da ap ïa ka jingai hukum jong kibor kiba halor.
“ Lada ka sorkar ka don ka jingkitkhlieh bad shimkhia naduh ka sngi ba u Myntri Rangbah u la pynbna ba ka sorkar ka shim ïa ka rai ban buh ïa kine ki border outpost, hapoh shi bnai ki la dei ban treikam,” ong u bah Malngiang.
Haba ïadei bad ka jingkren jong u Chief Executive Member ka Karbi Anglong Autonomous Council (KAAC) u Tuliram Ronghang ba ki nongshong shnong jongka jylla Meghalaya kiba shong basah ha Mukroh ki dei kiba shong beaiñ, U MLA ka Nongkrem u la ong ba ka jingkren jong u CEM ngim lah ban pdiang namar um tip eiei haba ïadei bad ki Map kiba la don lupa.
“Ka long kaba shai ba ka Mukroh ka hap hapoh ka jylla Meghalaya bad kane ka shnong kam dei ka jaka kaba hap hapoh ka jingïa kajia. Nga pynrem jur ïa kane ka jingkren jong une u CEM ba ki paidbah jong ngi kiba shong basah ha kito ki jaka ki dei kiba shong beaiñ,” ong u bah Malngiang.
U la ong ruh ba ka sorkar jylla kam dei ban shah ban buh ïa u mot sah kynmaw jong u forest guard na Assam u Bidya Sing Lekthe bad ban shna ïa ka skul ha Mukroh.
“Phi pynïap ïa la u jong u briew bad mynta ki kwah ban buh ïa u mot sah kynmaw na ka bynta jong u,” ong u bah Malngiang.
U la ong ruh ba ka Assam mynta ka pyrshang ban kam trai ïa ka Mukroh ba kane ka jaka ruh ka dei kaba don ha ka jingïa kajia.
“Ki pyrshang ban pynbor ïa ngi ban pdiang ba ka Mukroh ka dei kawei na ki jaka ba don hapdeng ka jingïa kajia. Ngin ym pdiang ïa kane dalei lei,” u la ong.
Na ka liang u bah Malngiang u la ong ba lada kine ki ar tylli ki jylla ka Assam bad ka Meghalaya kim lah ban pynbeit ïa u pud u sam , ka don satang kawei ka lad ba ngin hap ban leh katta ka long ban leit tied ïa ka jingkhang jong ka Supreme Court.
