MAIRANG:
U Deputy Commissioner ka Eastern West Khasi Hills District, u Bah Wilfred Nongsiej, ha ka 22 tarik Lber u la plie paidbah ïa ki artylli ki Dukan die dohkha ïa kiba la bei tyngka lyngba ka skhim jong ka sorkar pdeng kaba la ai kyrteng ka “Blue Revolution 2018-19” ha ka jingïalang kaba la pynlong da ka ophis jong ka Fishery Officer, Eastern West Khasi Hills District, ha ïew Langstieh, Mairang.
Ha kane ka jingïalang la wan ban sakhi lang u Syiem ka Hima Nongkhlaw, u Pa’iem P.M Syiemlieh, ki Myntri jong ka Hima, ki nongïalam shnong, u Superintendent of Fisheries ka West Khasi Hills District, u Bah E.R Laloo, ka Fishery Officer ka Eastern West Khasi Hills District, ka Kong J.L. Nonglait, ki nongri dohkha jong ka thaiñ bad kiwei kiwei.
Haba kren ha kane ka sngi, u Bah Wilfred Nongsiej uba long u kongsan, u la ong ba ïa kane ka projek kaba la pyntreikam da ka tnat ri dohkha ka jylla lyngba ka skhim “Blue Revolution”, la pyndep ha ka jinglut kaba long T. 10 lak kawei ka dukan die dohkha, ha kaba, T. 6 lak la bei tyngka lyngba ka subsidi katba T. 4 lak pat la bei tyngka da ki nongïohbhah na ka skhim. Shuh shuh u la ong ruh ba ka jingplie paidbah ïa kane ka projek ha kane ka sngi kan plie lad ruh ïa kiwei pat ki nongri bad nongdie dohkha ba kin kyntiew shuh shuh ïa ka kam ri bad die dohkha ka jong ki ha ki sngi ki ban wan lyngba ka jingkyntiew ïa ka jingdon jong ki nongïohbhah na kane ka skhim da ka tnat ri dohkha ka jylla.
