SHILLONG:
U Bah Paul Lyngdoh, Myntri ba dei peit ïa ka kam jngohkai, Social Welfare, Arts & Culture, Textile jong ka Sorkar Meghalaya ha ka 4 tarik Nailur, u la ïoh ban plie paidbah ïa kawei na ki jaka jngohkai kaba ki la khot kyrteng ka Synrang Mawrin Tourist Spot kaba ha ka jingmang pisa ba T. 1 klur 27 lak na ka MGNREGS bad T. 10 lak tyngka na ka BASIN ha shnong Mawten, South West Khasi Hills District.
U Bah Paul Lyngdoh haba kren ha ka jingïalang u la ai ka burom sha U Blei uba la plie lad ha kaba u la ïoh ban wan iuhkjat bad ban plie pyrda ïa kane ka jaka kaba itynnad kaba U Blei U la buh beit buh ryntih bad ka mariang kaba itynnad kaba pynkynmaw ïa ka jingkhraw ka jong U Nongbuh Nongthaw lyngba ki lum ki them, ki padun, ki kshaid kiba pynshohbiej bad khring ïa ki nongwan peitkai. U la ong ruh ba kane ka ri jong ngi ka don shibun ki jaka kiba itynnad kiba ym tang ba ki khring ïa ki nongjngohkai hynrei ki buh ïa kiwei ha ka lyngngoh bad ka peit jaw dud. Namarkata, u pynkynmaw ba ka pyrthei ka ithuh bad la ai kyrteng ïa kawei na ki krem ha Mawmluh Cave da ki Geologist da ka Meghalayan Age.
U la ong ruh ba ngin dang don shuh shuh ki jaka kiba khring bad ba ktik ïa ka dohnud kiba pynkren ïa u myllung ba un ïoh shibun kiei kiei kiba tei ïa ki jingmut jingpyrkhat bad jinglong mynsiem. U la ïathuh ba ka sorkar ka la don ka jingthmu na ka bynta ban kyntiew ïa ka kam jngohkai pyrthei ha kane ka dong ka thaiñ bad ban pynthikna ba un lah ban pyntreikam kloi lyngba ka jingïarap na ka AsEan Development Bank bad u kyrmen ba lyngba ka jingïarap bad kyrshan jong ki paidbah yn lah ban kyntiew ïa ka ïoh ka kot lyngba ka tourism bad ha ka juh ka por u la pynpaw ba la donkam ban shna ïa ka Tourism Police na ka bynta ka jingshngaiñ ki nongwan jngoh kai pyrthei. U la ïathuh ruh ba la mang ban bei pisa haduh 1000 tylli ki Home Stay na ka bynta ka dong ka thaiñ bad ban identity bad kita ki home stay kin treikam lynter ym ban shu pynleh noh ei. U la pynpaw ruh ka jingthrang ban pynurlong kloi ïa ki jingthmu bad ban pynwan dur ïa kane ka jaka kaba itynnad ha ka rukom kaba i-shong blei shongkun bad shongkhia.
Ha ka jingkren jong u Bah Renikton Lyngdoh Tongkhar, MLA u la pynpaw ka jingsngewnguh ïa ka block bad ka shnong kiba la lah ban pynlong ïa kane ka jaka kumba ka long mynta. Ha kajuh ka por u la pynpaw ka jingsngewkmen ban ïohi ïa ka jingïohi jngai jong ki nongshong shnong jong kane ka jaka ha kaba ki la jied da kane ka project kaba kham pynmyntoi ïa ka shnong ka thaw lyngba ka skhim 100 sngi. Shuh shuh u la ong ba kane ka jaka ka la don lypa ïa ka jingitynnad kaba la oh-shrong oh-shrup lyngba u nongthaw bad kin nang ïai pyrkhat nangne shakhmat kumno ban pyni itynnad bad pynwan dur ïa kane ka jaka katkum ba la mang bad bhah da U Blei Nongbuh Nongthaw. U pynpaw ka jingangnud ban wanrah shibun ka roi ka par (development) ha kane ka dong ka thaiñ bad kumno ban kyntiew ïa ka tourism ha kane ka jaka khnang ba un lah ban wan rah ka roi ka par ha ka dong ka thaiñ.
Kiba ïadonlang ha kane ka sngi ki long ka Kong Y.R. Mawlong, MCS, ADC, South West Khasi Hills District, u Bah G.D. Kharwanlang, MPS, Superintendent of Police, South West Khasi Hills District, u Bah I. Lawrniang, MCS, Block Development Officer jong ka Mawkyrwat C&RD Block, u Bah Renikton Lyngdoh Tongkhar, MLA ka Mawkyrwat Constituency bad kiwei de.
Ha kane ka sngi la ïoh ruh ka jingrwai kyrpang kata ka jingshad tynrai na ka Mawten Secondary School bad ka jingrwai tynrai na ka Eleven Secondary School. Ïa ka jingïalang ha kane ka sngi la pynïaid da u Bah Nolipstar Lyngdoh, Chairman jong ka Tourism Committee, ka jingkren pdiang na u Bah L. Lyngdoh, Myntri Shnong Mawten bad ka jingkhublei na u nongpynïaid.
