MAWKYRWAT:
Ka Sei la -i-sap Organization Mawlangwir, South West Khasi Hills District ha ka 7 tarik Kyllalyngkot ka la pyllong ïa ka tamasa lehkmen snem thymmai 2023. Ha kane ka tamasa la pynlong ha phyllaw jong ka Balang Mawlangwir Higher Secondary school ha kaba u Bah Sounder Strong Cajee u kyrtong ka TMC na ka Mawkyrwat konstitwensi u la long kum u kongsan.
Shwa ban plie ïa kane ka tamasa la pynlong ka jingïalang ba lyngkot ba la pynïaid u Bah Refulgen Wanniang u President ka Sei la-i-sap organization Mawlangwir bad la don lang u Bah Lambokstar Marweiñ u President ka HANM SWKHD kum u symbud kongsan, kiwei de ki riew rangbah ki long kmie bad da ka jingïashim bynta jong ki Village Organization kiba don hapoh jong ka shnong Mawlangwir.
La pynlong shibun ki jingïalehkai kiba pynbyrngia ïa ki paidbah bad kumjuh ruh ïa ki jingdie ïa ki jingbam bapher bapher na ki kynhun jong ki VO bad kumjuh ruh na ka kynhun jong ka Sei la-i-sap organization bad la pynshit pynshngaiñ shuh shuh da ki jingshad bad ki jingrwai na ki samla na kane ka shnong Mawlangwir, South West Khasi Hills District.
U Bah Cajee u la ong ba kum ki samla na kane ka dong ka thaiñ ki long shisha kiba don bun ki sap ki phong kiba long shisha ka nuksa ïa kiwei pat. Haba kren ha ki kam ïoh kam ïoh jam kam dei eh ban ïohi tang ïa ki kam sorkar hynrei ka dei ruh ka kam ban seng kam lajong ban long kynrad da lade ïalade.
U la ong ruh mano ban ai mynsiem ïa kiwei pat ki samla kiba im hapoh sor dei ki khynnah na Maram kiba leit ban seng ki kam lajong da kaba leit bylla kit nong daju sha sor Shillong ban buh ki dukan khapshniuh, ban leit bylla pynkhuid niud sha sor, shibun ki khynnah samla kiba leit pule sha nongbah Shillong kiba leit bylla kit daju, bylla ïing briew seng dukan kiba ki la don ïa ka kyrdan degree sha jrong kim lehraiñ bad ki kheiñ ba la da ki don ki trei ha kano kano ka kam ka burom ka don.
Namarkata kum kine ki kam ba ki maram ki don iaka sap ngim donkam ban beh bar jylla da ka bor ban shoh ban dat hynrei leh da kine ki kam kin sa duhjait kin phet hi la jong da kaba knieh noh ïa kiei kiei ba ki bar jylla ki ju wan kamai spah napoh jong kane ka jylla jong ngi. Kane ka Sei la-i-sap na Mawlangwir kin sei ïa kita ki sap bad kan long ka nuksa ïa kiwei pat ki briew hapoh ka jylla.
U la ong ruh ba dei ban don ka sap ban thaw ki lad ki lynti bad ban don ha la ki jong ki kam, ym ban long ki nongkhrong hapoh ka ri lajong hynrei dei ban long ki kynrad hala ka jong ka ri. “Ngim don por shuh ban wad ïa kita ki kam sorkar hynrei ka la dei ka por ba ngin ïeng ha la ki jong ki kjat ha la ki jong ki sap ki phong bad dei hangta ngin sa long kynrad ha la ka jong ka kam bad ngin sa ïa kiew bad ïa ïoh kam ban ïa kyntiew para doh para snam ym ban ïa ailad ïa kiwei pat ki jaitbynriew ba kin wan ban kamai spah na kane ka ri ka ieid eh ka jong ngi, khlem lehraiñ la ha kano kano ka kam’, la ong u Bah Sounder.
