SHILLONG:
U Myntri Rangbah ka jylla u Conrad K Sangma ha kane ka sngi Baar u la plie ïa ka Block thymmai ka Siju C&RD block ha South Garo Hills kaba ki paidbah ki la angnud slem bha.
Ha kane ka jingplie, u Conrad u la ai nam ïa u Myntri Rangbah ba nyngkong ka Meghalaya u Captain Williamson A. Sangma.
“U Captain WA Sangma u la don ka jingieid kaba khraw bad sngewkhia ïa ki riewlum uba la ïalam ban ïakhih ban ïoh ïa ka jylla lajong, kaba ngi khot sngew sarong kum ka ïing. Mynta, ngi la rakhe ïa ka jubili ksiar jong ka jylla jong ngi bad ka dei ka jingsahkynmaw bad ka jingïalang kaba ïahap sur ba ngi la thaw ïa ka Siju C&RD block ha ka jaka jong u,” la ong u Myntri Rangbah.
Haba kren ha kine ki 50 snem ka jylla, u Myntri Rangbah u la ong ba kum ka jylla ka la ïoh shibun ki jingkylla ha kine ki 50 snem hynrei ka dang hap ban ïaid shibun shuh. “Ngi dei ban don ka thong na bynta ki 50 snem ban wan bad ban pyntyllun ïa ka thong ba ngin ïoh ban rakhe ïa ka jingdap 100 snem ka jylla kaba ïaid shaphrang bad kaba pahuh pahai”, la ong u Conrad
Kumba 3000 ngut ki paidbah kila sakhi ha kane ka jingplie ïa ka Block ha Siju ha kaba la synran lang ïa u Myntri Rangbah da u Symbud Lamphang ka ïing dorbar u Timothy D Shira, ki MLA kynthup ïa u Rakkam Sangma, Marcuise Marak, Jim Sangma, Rupert Momin bad u Chief Executive Member ka Garo Hills Autonomous District Council.
Kila pyllong ruh ïa ka jingjurip ïa ka jaka ban shna shipor ïa ka ophis ka Block ha Siju bad ka jingtei ïa ka ophis thymmai kan sdang shen.
Ha kane ka jingïalang, u la aiti ruh ïa ka cheque ka skhim FOCUS plus sha ki SHG kaba kot T. 28 Lak hapoh ka Meghalaya State Rural Livelihoods Society – MSRLS.
Kumjuh u la sam khun sniang 1392 tylli sha ki 348 ngut ki nongrep bad 2500 tylli ki syiar kuroiler sha ki 50 ngut ki nongrep na ka Rural Backyard Piggery and Poultry scheme-PROGRESS.
La sam ruh T.1 Lak sha ki kynhun samla ka Siju hapoh ka skhim YESS Meghalaya.
U Myntri Rangbah u la plie ruh ïa ka Collective Marketing Centre jong ka Gangga Awe IVCS ha Siju ba la bei pisa ka Meghalaya Livelihood Access to Market Project (MLAMP).
