JOWAI:
Ka Maitlynti Rural Development Society (MRDS), Bataw, East Jaiñtia Hills District, ka la ïoh ban plie ïa Horticulture Collection Center kumjuh ruh ïa ka ophis jong ka, ha ka 14 tarik Risaw, 2022. La wan ban plie da u MLA ka thaiñ u ma Kyrmen Shylla, ryngkat ka jingïadonlang ka kong H. Suchiang District Horticulture Officer (DHO) EJHD, u ma Tammiyaki Shylla BDO Wapung C&RD Block, EJHD, u ma Shemi Rupsi Waheh Shnong Bataw, ki paidbah nongrep ka thaiñ bad kiwei de.
Na ka liang ki nongrep ki la pynpaw ba ka thaiñ Bataw ka dei kawei na ki thaiñ kaba pynmih ïa u sohñiamtra u ba bang bad kiwei de ki mar rep kum u sohmynrit, u sohmynken, u sying, u shynrai bad kiwei kiba long kiba seisoh. Na ka liang jong ki nongrep ki la pynpaw ka jingsngewnguh kaba khraw ïa ka MRDS ba da ka jingshimkhia ka jong ka ban wan buh ïa kane ka ïing, kan wanrah shibun ki jingmyntoi ïa ki nongrep nongriang.
U ma Deihok Sumer uba long u General Secretary MRDS, u la ong ba ïa kane ka Society la seng ha ka 5 tarik Risaw, 2019 bad ka thong jong ka, ka long ban kyntiew ïa ka rep, ka riang bad kumjuh ka jingnang jingstad ha ka shnong ka thaw bad ha ka thaiñ hi baroh kawei. Hynrei kane ka seng ka la buh ka thong kaba hakhmat eh, bad kata ka long ban kyntiew ïa ka kam rep kam riang bad ha ka jingïadei bad kane da ka jingïarap jong ka ophis ka DHO Khliehriat, ki la lah ban wanrah ne tei ïa kane ka Horticulture Collection Center kaba ki la sdang ban tei naduh u snem 2020.
Shuh shuh u la ong ba ka jingdon kane ka Center kan ai jingïarap shibun ïa ki nongrep namar lada ki nongrep kin leit die dalade, kan shem jingeh ïa ki ha ka bai kit, bai bah, ban leit die sha ki ïew ki hat kiba jngai ha kaba don ki por tang ka bai kali ruh kim lait hynrei da ka jingdon kane ka Center, ki nongrep ki lah ban leit buh ïa ki mar jong ki, hangne bad ka Society pat kan sa pynïaid ïa ki mar jong ki.
Ha ka jingkren kum u kongsan, u ma Kyrmen Shylla u la ïaroh ïa kane ka Society da ka jingkular ba un ïarap ban wad ki lad ki lynti ban wanrah ka jingmyntoi ïa ki nongrep ha kane thaiñ kumjuh ruh ïa baroh kawei ka District. U la ong ruh ba ka jingdon kum kane ka society kan wanrah shibun ki jingmyntoi ïa ki nongrep ha kaba ïadei bad ka dor jong ki mar rep bad ka bai kali. Ha ka jingïadei bad ka surok kaba sniew bha sha kane ka thaiñ, u la ong ba mynta ka tender ka dang ïaid bad shen yn sa pynshna ïa kane ka surok kaba pynïasoh shibun tylli ki shnong bad ‘ka jingpynshna ïa kane ka surok kam dei kaba rit ka jinglut, hynrei ka dei ka ban lut da ki phew klur tyngka’ la ong u ma Shylla.
Na ka liang ka DHO East Jaiñtia Hills District, Khliehriat, ka kong H. Suchiang, ka la kyntu ïa ki nongrep ban wan mih sha ka ophis jong ka, ha kano kano ka por ba ki donkam jingïarap ha kaba na ka liang ka ophis kan lah ban ai ki jingïarap ïa ki katba don, kiba ka ophis ka lah ban ai na ka bynta ki nongrep. Ha kane ka sngi la ïoh ruh ka jingkren na u ma G.S. Pala Functional Manager, u ma Skhem Sumer Assistant Waheh Shong, u ma Shemi Rupsi WS Bataw bad kiwei kiwei.
