NONGSTOIÑ:
Ka St. Joseph’s Seminay Pyndengrei Nongstoiñ, mynta ka sngi ka 27 tarik Jymmang ka la ïoh ban plie paidbah noh ïa ka Multi-Purpose Hall ha kaba u MLA barim ka Nongstoiñ konstitwensi u Bah Macmillan Byrsat u la long kum u kongsan.
Ïa katei ka Multi-Purpose Hall la tei lyngba ka skhim CMSDF jong u snem 2021-22 ha ka mang pisa kaba 12 lak tyngka ha kaba la ïoh ruh ban plie da u Bah Macmillan Byrsat ha ryngkat ka jingïadonlang u Fr. Alphonsus Wahalng u Rector, u Fr. Marius Thongni Parish Priest ka Pyndengrei Parish bad kiwei kiwei.
Haba ai jingkren kum u kongsan ha katei ka jingïalang plie paidbah, u Bah Macmillan Byrsat u la ong ba ha ki 5 snem jong ka jinglong MLA jong u la lah ban ïarap ïa ki kynhun Balang bapher bapher kiba don ha ka district bad ka jingai skhim ka la kot sha ka 2 klur 50 lak tyngka.
U Bah Byrsat u la ong ba ka jingnoh synñiang sha ki kynhun Balang ka long na ka bynta ba kin dang lah ban tei ïa ka imlang ka sahlang ym tang ba kin shu kut ha ki saw kynroh bad u la ong ruh ba ka St. Joseph’s Seminay Pyndengrei Nongstoiñ kadei kaba kham kyrpang namar kadei ka shlem ba ai jinghikai ïa ki khynnah ym tang ha ka jinglong ba kynja mynsiem hynrei ha baroh ki liang na ka bynta ban tei ïa ka imlang ka sahlang.
