JOWAI :
Ka Jaiñtia Hills Development Society (JHDS) kaba long kawei na ki kynhun treimon sngewbha hapoh ka imlang ka sahlang, mynta ka sngi kala ïoh ban plie ïa ka jaka ai jinghikai ha ka kam suhjaiñ, ba 60 sngi lynter na ka bynta ki 30 ngut ki kynthei hapoh katei ka Society kaba don ha Bishop House, Lumbih Syntu Mihmyntdu.
Ha shuwa kane la don ka jingïalang ba la pynïaid ha Samanlang Socio-Cultural Pastoral Center Jowai Diocese, ba la pynïaid da u Denis Kurkalang Programme Coordinator JHDS. Ïa kane ka jaka ai jinghikai la wan ban plie da u kongsan uba dei ruh u MLA ka Jowai konstitwensi, u ma Wailadmiki Shylla, ha ryngkat ka jingdonlang u Father Manbha Pakem Director JHDS, u Bah Grevile Kharlikhi Assistant General Manager NABARD, u ma Lambormi Suchen, Skill Development Officer, u Father Ferdinand Dkhar Diocesan Administrator Jowai, nalor kiwei de kynthup ïa kiba shah hikai lem bad ki nongtrei ka JHDS.
Ïa kane ka prokram ai jinghikai la ïarap ban kyrshan lang da ka ‘Khublei Germany’, ha ryngkat ka jingïarap pisa na ka National Bank for Agriculture and Rural Development (NABARD) Shillong. U MLA u la ong ruh ba mynta ka long kaba eh ïa baroh ki khun samla ban ïoh ïa ka kam sorkar bad u buh ka jingkyntu ïa ki samla ba kim dei ban shañiah tang ha ka kam sorkar ‘namar wat ka kam la jong ruh ka dei ka lad kaba lah ban pyndap pynbiang ïa ki jingdonkam’.
Ha kane ka sngi, u kongsan ma Wailad u la khap ruh ïa u ribon jong katei ka jaka ai jinghikai suhjaiñ kaba donlang ïa ki kor suhjaiñ kaba la sdang ban treikam naduh mynta ka sngi bad ka ban neh haduh ar bnai lynter.U MLA u la kyrmen skhem ba kane ka shlem ai jinghikai kan long ka jingïarap kaba khraw eh ïa kiba shah hikai ban ïoh pyntbit ha kane ka kam bad ki lad jingtip kiba lah ban ïoh na kane ka jaka ba ai jinghikai. Ïa ki kyntien pdiang sngewbha ha kane ka sngi la ïoh na ka Mandakini Nongtdu, Coordinator FARM, katba ïa ki kyntien ai khublei la ïoh na ka samla Angeline Lamare, Counselor Childline Jowai.
