SHILLONG:
Ka pule puthi ka dei kawei kaba don kam tam ha kane ka juk kaba mynta. Kaba ki khun samla ki dei ban pynleit jingmut ban poi sha kat thong kaba ki don.
U MLA ka Mawkynrew konstitwensi u Bah Banteidor Lyngdoh u la plie paidbah ïa ka kamra skul jong ka Sengbhalang Secondary School Laitlum, kaba u la mang pisa ha ki snem ba la dep bad mynta ki la lah ban pyndep bad la ïoh ban plie ba kin ïoh ban pyndonkam.
Haba kren ha kane ka sngi u bah Lyngdoh u pynpaw ïa ka jingsngewkmen ba kila lah ban pynurlong ïa kane ka jingdonkam jong ka skul. U la ai jingïaroh ruh ïa ka kong Livia Nongspung kaba ïohi jngai da kaba seng ïa kane ka skul ban ai jinghikai ïa ki khynnah bad ki samla jong kane ka thaiñ.
“Shibun ki jingeh kiba ngi hap ban ïakynduh ha ka jingim ka jong ki, ym tang ki nongpynïaid kiba ïakynduh jingeh, hynrei ki nonghikai, ki kmie ki kpa bad baroh kiba don bynta,” u la ong.
U la kyntu ruh ïa ki kmie ki kpa jong ki khynnah ba kin ia treilang ryngkat bad ki nongpynïaid skul ba kin lah ban ai ka jingshakri kaba bha.
U la ai jingïaroh ruh ïa ki nonghikai kiba latrei shitom bad kyntiew ia kane ka skul, khamtam ia ki khynnah pule kiba la leh bha ha kane ka SSLC eksamin ba dang shu dep ha kaba baroh ki khynnah na kane ka skul ki la pass baroh, katta 100%.
Ha kane ka sngi u bah Banteidor u la noh synñiang ruh da ki jaiñ kup slap sha ki nongdie sha kiba die jingdie ha Laitlum, ka jaka jngohkai kaba khriang ïa shibun ki briew, ymtang ïa kiba na ka jylla hynrei ki wei ruh kiba wan na kylleng sawdong.
U la ong ruh ba lyngba kane ka kam jngohkai shibun ki longiing ki im ja bad ïoh ban bsa ïa ka iing ka sem jong ki, u don jingkyrmen ba ha kine ki snem ki ban wan kin dang lah ban pynbha shuh shuh bad ki samla kiba la nang la stad kin ïoh ban seng kam seng jam da lade bad ban ïarap kylliang ïa ki wei ruh.
