SHILLONG:
Kum ka wei ka sien jam ka ban ïarap ban pynneh pynsah ïa ka riti ka dustur ka jylla, u, Myntri rangbah, u Conrad Sangma u la plie paidbah ïa ka Shillong International Centre for Performing Arts & Culture (SICPAC) hapoh ka tnat treikam jong ka Arts & Culture kaba don ha Mawkasiang mynta ka sngi ha ryngkat ka jingïa don lang u symbud myntri Rangbah u Bah Prestone Tyngsong, u myntri ka tnat Arts & Culture- u Bah Sanbor Shullai, u Chief Secretary, ka sorkar jylla u Bah Donald P Wahlang, IAS, Commissioner & Secretary, Arts & Culture u Bah Frederick Roy Kharkongor, IAS.
Kane ka jingtei ka long ka ba nyngkong ha ka jylla haba ïa nujor ïa ka rukom shna bad pynwan dur. Da ka jingdon kane ka SICPAC, kan long ka jingurlong ïa ki jingthrang jong kiba bun ki samla bad ki riew don sap ha ka jylla.
Ha kane ka Project SICPAC lah ban ïohi ïa ka jingtei ka ba skhem bad ka ba paka, ka ba pynitynnad shuh shuh da ka jingdon ki jaka peitkai bad ki hall rit kiba bunjait, kum ka Multipurpose Theatre kaba lah don haduh 1739 tylli ki jaka shong, ka jingdon ka jaka peit kai ba 302 tylli ki jaka shong, ka Black Box Theatre ba 574 tylli ki jaka shong, bad ka Open-Air Theatre na ka bynta 15,000 ngut ki nongpeit kai, kaba lah ban khring ïa bun ki nongpeit kai, ka ba la ker pyllun da ka um. Ïa kane ka jingtei la shna ha ka jinglut kaba 151.33 klur tyngka da ka jingïarap pisa kaba 136.20 klur tyngka na ka Central Non-Lapsable Central Pool of Resources (NLCPR)- (ba la pyllait da ka M/O DoNER, Govt. of India) bad 15.13 klur tyngka na ka jylla.
Haba kren ha kane ka program, u Myntri Rangbah ka jylla u Conrad Sangma u la ong, “Ka Shillong International Centre for Performing Arts & Culture kan wanrah ka jingithuh kyrpang ha ka ri bad wat ha ka pyrthei hi, ha ka ba ïa dei bad ka Performing Arts. Kane ka jingdon kane ka jaka kan plie lad ruh ïa ki samla ka jylla kiba don bun ki sap ki phong. Kum ka International Convention Centre kaba don ha jylla, kane kan wan rah shibun ki jingmyntoi ïa ki samla ka jylla bad ki thaiñ shatei lammihngi jong ka Ri India, kiba la pyntbit ïa lade ha ki laiñ kiba pher bapher ba kynthup ïa ka art, music, films, television, bad multimedia. Bad yn buh ruh ïa ka museum ka ban pyni ïa ki riti ka dustur jong ka jylla ka ban khring ïa ki nongpeit kai na kylleng.”
Ha kane ka jaka, SICPAC ka don ka Art Gallery, ka Sky Theatre, ka Special Exhibitions Space, ka jaka shong ki VIP, ka Auditorium Hall bad ka jaka peit kai ba shad pyllun, ka VIP Banquet Hall, ka VIP Lounge, ka VIP Rest Room, ka Tribal Museum, ka Media Centre, Television & AV Studio, ka Library, ka Food Court bad ki jaka shong ki nongtrei.
Ïa ka Meghalaya Government Construction Corporation Ltd la thung da ka PMC (Project Management Consultant) bad M/s Hindustan Steelworks Construction Ltd (ka project jong ka sorkar kmie), M/S NCC Limited bad ka M/s Skematic Consultants ki dei ki ba ïa don kti ban pynlong ïa kane ka jaka kumba ka long mynta.
