SHILLONG:
U Myntri Khynnah jong ka tnad Home Affairs ka Sorkar Pdeng, u Nityanand Rai ha ka 4 tarik Jymmang u la leit jngoh ïa ki shipai khappud jong ka Meghalaya BSF Frontier bad plie ruh ïa ka kad khaïi pateng Dawki Land Port kaba don ha Dawki bad hap ha West Jaiñtia Hills District jong ka Meghalaya.
Haba kren ha kane ka sngi, u Nityanand Rai u la ong ba ka jingplie ïa kane ka lad khaïi pateng kan kyntiew ïa ka khaïi ka pateng bad ïa ka jingïadei hapdeng ka India bad ka Bangladesh. U la ong ruh ba ka don ka jingïasyriem hapdeng ka larity jong ka India bad ka Bangladesh. U la ïathuh ruh ba u Myntri Rangbahduh Narendra Modi u la ïaleh katba lah ban wanrah ïa ka jingroi ha Dong Shatei Lam Mihngi.
“Ka Sorkar India ka la shim khia ban peit ba ka Meghalaya, la ka long ka kaba pynkiew ïa ka larity, ka jingai ka jingoit jingkhiah kaba kham bha bad kiwei ki phang”, la ong u Nityanand Rai. Ka Sorkar India ka pyrshang ban pynlong ïa ka Meghalaya ka bakhlaiñ bad ban shuh shuh ba ka lad khaïi Dawki Land Port kan kyntiew ïa ki kam jngohkai pyrthei bad ïa ka khaïi ka pateng jong kine ki artylli ki ri. U la ïathuh ruh ba ka Dawki Land Port ka don bun bah ki jingpynbiang kum ka jingdon jong ki kudam, ki jaka ban buh ïa ki tiar bad ki mar jong ki nong wan jngoh kai pyrthei, ki Electric Sub-Station bad kiwei ki jingdonkam.
U la ïathuh ba ka jingdon jong kane ka Land Port ka long ban pynbiang ïa baroh ki jingdonkam jong kito kiba dei ban ïoh bynta ha kane ka kam khaïi pateng. U Myntri Khynnah u la ïaroh ruh ïa ka jingitynnad jong ka shnong Dawki kab don ïa ki lum ki wah bad ki kshaid banoh rymphum.
Ha kane ka jingwan jngoh jong u baar sngi ïa ka Meghalaya, u Nityanand Rai u la ïoh ban ïaphylliew jingmut bad ki heh jong ka BSF kiba bat ïa ka kyrdan Commander bad kum juh ïa kiwei shipai khappud jong ka Meghalaya BSF Frontier.
Ha kane ka jingïakren jong ki, la ïoh ban pynsngew ïa ka jingtrei kam jong ki BSF bad ruh ïa ka jinglong jingman ha ki khappud jong ka India bad Bangladesh. Ha kane ka jingwan ïa ka jylla, ïa u Nityanand Rai la pdiang sngewbha da u Pradip Kumar uba bat ïa ka kyrdan Inspector General ka Meghalaya BSF Frontier bad ki ophisar rangbah jong ki BSF ha Dawki Border Out Post. U Inspector General Pradip Kumar u la batai ruh ïa u Myntri Khynnah Nityanand Rai ïa ki jingtrei kam jong ki BSF bad kiwei ki jingkitkhlieh ba la bynshet ha ki.
Kine ki arngut ki la ïoh ruh ban ïakren shaphang ki jingeh ki babun kiba mih na kawei ka por sha kawei pat ha ki khappud jong ka India bad Bangladesh. La ïoh ruh ban ïakren ïa ki jingtrei jong jong ki shipai BSF ha kaba ïaleh pyrshah ïa kam sniew kiba bun jait ha ki khappud jong kine ki artylli ki ri. U Myntri Khynnah u la pynsngew ba ki shipai BSF ba ki dei ban long kiba la pynkhreh ban ïaleh pyrshah ïa ki kam sniew kiba lah ban mih ha ki khappud jong kine ki artylli ki ri bamarjan. U la kyntu ruh ba ki jaka khappud ki dei ban long kiba lait na kino kino ki kam sniew. U Nityanand Rai u la ïaroh ruh ïa ka jingtrei shitom, ka jingshlur bad ka jingaiti met bad mynseim jong ki shipai khappud jong ki BSF ban ïada ïa ki jaka khappud jong ka ri.
U Nityanand Rai u la plie ruh ïa ka Dawki Integrated Check Post ha kaba la don lang ruh u Symbud Myntri Rangbah ka Meghalaya, u Bah Sniawbhalang Dhar, u heh pulit Director General ki pulit ka Meghalaya, u High Commissioner jong ka India ha Bangladesh bad kiwei ki hed Sorkar jong ka Land Port Authority of India bad Meghalaya BSF. Ka Dawki Integrated Check Post ka ka dei kawei na ki jingtrei bakongsan jong ka Sorkar India bad ka jingthmu jong ka, ka long ban pynkiew ïa ka khai ka pateng hapdeng ka India bad ka Bangladesh.
Ka Dawki Land Port ka long ka jingtrei kaba kongsan jong ka Sorkar India Government of India bad ka jingthmu jong ka ka long ban kyntiew ïa ka khaïi ka pateng hadeng ka India bad ka Bangladesh. Ka Dawki ka don ha West Jaiñtia Hills bad ka jngai tang 55 Km na ka Jowai Headquarter jong ka West Jaiñtia Hills District bad ka jngai ruh tang 84 Km na Shillong. Ïa ka jignbuh bad jingshna ïa ka Dawki Land Port la ai jingmynjur da ka High Level Empowered Committee jong ka tnad Ministry of Home Affairs ha ka 4 tarik u Rymphang 2016.
Kane ka kad khaïi pateng ka heh haduh 23.0 akar. Ka jinglut baroh ha kaba shna ïa kane ka lad khaïi pateng, kynthup ïa ka dor jaka bad kiwei ki jingtei ka long baroh T.83.38 klur. Katei ka jinglut ka kynthup ruh ïa ka jinglut kaba T.9 klur na ka bynta ka jingsiew jaka bad T.74 klur na ka bynta kiwei ki jingtei.
