SHILLONG:
Kum shibynta ban peitngor ïa ka jinglong jingman ha ka jylla bad kumjuh ban pynthikna ïa ka jingpyntrei hok ïa ki skim bapher bapher ha ka jylla, u Myntri Rangbah ka jylla ha ka 22 tarik Nohprah u la plie ïa ka shlem treikam jong ka Meghalaya State GIS & UAV Center ha Secretariat.
Haba kren bad ki lad pathai khubor, u Conrad K Sangma u la ong ba la buh ïa kane ka Centre ba kan long ka ban ai jingmyntoi ïa ka jylla da ka jingpyndonkam ïa ki kor ki bor kiba thymmai, ki dur ki dar na Satellite bad ki Drone.
“Ka jingdon jong kane ka Center kan long na ka bynta ban peitngor bniah ha kiba bun ki liang khnang ba ka sorkar kan lah ban ai ïa ka jingshakri kaba kham bha bad ban peit bniah” u la ong.
“Kane ka Center kan peitngor ruh ïa ka jingpyntreikam ïa ki skim bapher bapher ha kylleng ki District jong ka jylla” u la bynrap.
U Myntri Rangbah u la pyntip ruh ba kane ka center kan pyndonkam ïa ki Drone ban peit ïaka jingdheng kali bad ki pulit ki lah ban peit ïa kine ki video ha kaba ïadei bad ka jingdheng kali bad wat ha ka por ba don ka jingbym shongsuk shongsaiñ, ka jingshlei um bad kiwei kiwei.
U Myntri Rangbah u la kdew ruh ba ka jingpyndonkam ïaki Drone kan long kaba ai jingmyntoi bha ïaka sorkar jylla ha ka ban shim ïa kino kino ki rai kiba kongsan.
U Conrad ula pyntip ruh ba kane ka centre kan sa ai jinghikai ruh ïaki samla ha ka jylla ban pyntbit ïalade na ka bynta ban pyndonkam ïaki Drone bad ban leh ïa ka Mapping bad kiwei kiwei.
