SHILLONG:
U Myntri Rangbah ka jylla Meghalaya, u Conrad Sangma u la plie pyrda ïa ka North East Fruit Wine Incubation Centre ha ka phyllaw jong ka IHM Shillong kaba don ha Mawdiangdiang, Shillong ha ka 14 tarik, Nailur. Ka centre ka dei kaba ïateilang hapdeng ka Meghalaya Farmers Welfare Commission bad ka IHM, Shillong. Ka centre ka la plie pyrda ïa katei ka tamasa ha ka jingïadon lang jong ka Myntri ka rep ka riang, ka Kong Ampareen Lyngdoh bad u Myntri Rangbah ka Excise, u Kyrmen Shylla.
Haba leit sha ka X(Twitter), utei u Myntri Rangbah u la thoh, ‘Ka jingplie pyrda ïa ka North East Fruit Wine Incubation Center ha ka phyllaw jong ka IHM Shillong kaba dei ba nyngkong jong ka tamasa ha ka jylla North East.’ Ka jingshna ïa ka waiñ ka la long ka riti ka dustur jong ki paid riewlum jong ka jylla jong ngi bad lyngba kane, ki nongshong shnong ba dei ki nongshna waiñ bad ki nongseng kam lajong ki lah ban ïoh jingkyrshan ha ka ban shna waiñ, pynsong bad ban die ha ïew ha hat. Kane ka jingïohi jngai ka long ban rah noh ïa ka jingshna ïa ki waiñ ba la shna na ki soh grape katba ngi la khmih bniah ha ki waiñ soh, da kaba pynleit jingmut halor ki soh ba mih na shnong bad ban ïaid shakhmat ha ka jingthmu jong ngi ban pynlong ïa ka Meghalaya kum ka nongbah jong ka jingshna ïa ki waiñ na u soh ne ka “Fruit Wine Capital of India.”‘
U Sangma u la bynrap shuh shuh da kaba ong, ‘Nga sngewtynnad ban ïohi ïa ka rukom song ïa ki waiñ shnong kaba long kum ka jingkylla bakhraw naduh ki snem ba la dep. Kane ka jingthmu kan ïarap ïa ki nongrep bad ki nongshna waiñ jong ka jylla ba kin ïoh nong ïoh jingmyntoi na ka jingmih jong ki bad pynshlur ïa ka jingseng kam lajong hapdeng ki samla.’ Haba la kren ha katei ka jinplie pyrda ïa kane ka tamasa, utei u Myntri Rangbah u la ong ba ka jingtei ïa ka jaka jong ki soh waiñ ka pynkynthup lang ïa ka kam jngoh kai pyrthei bad ka kam rep kam riang bad kan ïarap ha ka ban kyrshan ïa ka jingseng kam lajong bad kan kiew ha ka jingïoh kam ïoh jam. Katei ka jingbuh ïa ki waiñ soh ne ka incubation center ka long kaba donkam bad u Myntri Rangbah u la bynrap ba kan wanrah ka jingkylla ha ka jingim jong ki briew.
