MAWKYRWAT:
Hapdeng ka jinglong khynnah bad ka jingbymtip, kumba 14 ngut ki khynnah rit na ka thaiñ Wahkaji ki la poi hospital ha ka 21 tarik Jylliew na ka daw ba ki la bam ïa u tit buid tang para khynnah kaba la jia ha ka 20 tarik Jylliew 2023.
Katkum ka jingïathuh ka Kong Elenda Sangriang, ka kmie jong ki khynnah rit na ka shnong Mawpat na ka thaiñ Wahkaji South West Khasi Hills District, ka la ong ba kane ka jingjia ka la jia ha ka 20 tarik Jylliew ha kaba ki khun jong ka ki la leit kheit ïa u tit tang para khynnah bad ki la ïa shet hi haba ki kmie ki kpa kim shym don ha ïing. Hadien ba ki kmie ki kpa ki la poi ha ïing, ki la ïohi ba ki khun ki la prie bad pynhiar bad ynda la kylli ki la ïathuh ba ki bam ïa kita ki tit ba ki kheit na khlaw.
Kumta la rah noh kyrkieh ïa ki sha ka jaka sumar ha CHC Wahkaji hynrei la phah kit noh ïa ki sha Mawkyrwat ban ïoh ïa ka jingsumar kaba kham biang shuh shuh hapoh ka Hospital 100 jingthiah.
Na ka liang u Dr. R.M. Lathong u kyntu ïa ki paidbah, ki kmie ki kpa bad ruh ïa ki khynnah ba kim dei ban bam kulmar ïa ki kynja tit namar ki don ki tit kiba long bih kiba wanrah ka jingmynsaw ïa ki briew lada ki bam ïa ki.
U Dr. R.M Lathong u la ïathuh ruh ba 11 ngut ki khynnah ki la koit bad satang 3 ngut kiba dang shah sumar.
