MARIAMPUR:
Katto katne ngut ki nongïashim bynta ha ka jingleit on tep kaba la long ha kawei ka shnong ha Assam, ka Mariampur kaba hajan Adokgre ha North Garo Hills, ha kaba la kynnoh ba la ai jingbam kaba kynthup ïa ka dohkha, ki la kem pang bad la rah noh ïa ki sha hospital ha ka 10 tarik Jymmang.
Ka Achik Organisation for Social Welfare (AOSW), ka seng trei mon sngewbha ha kane ka thaiñ, ka la ong ba kane ka jingkem pang ka dei na ka daw ba ki bam ïa ka dohkha bad ka doh sim kiba la sniew na Assam, kiba la injek da ki dawai ban pynneh ha ki dohkha bad ki sim kiba long bih.
“Ngi la sakhi hynnin ha ka sien ba ar ba palat ïa ka 160 ngut ki paidbah kiba la ïashim bynta ha ka jingleit on tep ha ka shnong Mariampur, kaba don ha khappud Meghalaya, kim tip briew shuh hadien ba ki la bam ïa ka dohkha challan ba la ai ha kane ka jingjia. La shem ba baroh ki don ïa kijuh ki dak jingshitom kaba jia lada bam ïa ka dohkha challan ba long bih,” la ong u president ka seng u Gripping Marak.
U la kdew ruh ba ha ka riti dustur tynrai jong ki Garo haba leit on tep, la ju pynkhreh ïa ka bam ha ka shnong ba don kane ka jingjia na ka bynta baroh kiba wan ïashim bynta.
Haba kyntu ïa ki paidbah ban long kiba husiar haba thied ïa ki dohkha bad ki doh sim kiba la wanrah na Assam ha kaba la don ki jingjia kiba kum kine, ka seng ka la ong, “Ïa kijuh ki dohkha la shallan sha Garo Hills bad ki bor pynïaid distrik ki la dei ban pyrkhing bha ha kaban talasi khlem da pyntud ïoh ba kajuh ka jingjia kan jia ha Garo Hills ruh. La dei ban peit bniah ïa ka jingshallan ïa kine ki mar, namar man ka sngi la ju shallan ïa kine ki mar, khamtam ki dohkha, sha Garo Hills ha ki thuk thuk bad ki kali khlem don ba talasi.”
