PATHARKHMAH:
U khñiang jingpang lumpy skin disease uba la ktah ïa kiba bun ki masi ha ki katto katne ki bynta jong ka Meghalaya ha ki katto katne sngi ba la leit, u la saphriang ruh sha ka shnong Patharkhmah ha Ri Bhoi district.
Une u khñiang jingpang uba lah ban ithuh na ka jingdon ki jingat ha ka snieh doh jong ki masi, la ïohi nyngkong ha kawei ka masi kaba ïaid ha ki lynti synkien ha Patharkhmah.
Hadien ba la ïoh ïa kane ka jingtip, u rangbah shnong ka shnong Patharkhmah, u Bah Najim Kharmalki u la hukum ïa u trai jong kane ka masi ba la shah ktah ban pynkyrpang ïa ka na ka bynta ban ai jingsumar, khnang ban khanglad ïa une u khñiang jingpang na kaba saphriang sha kiwei ki masi ba koit ba khiah.
U rangbah shnong u la kyrpad ruh ïa ka sorkar ban ai jingïarap bad ïa ka tnad Veterinary ban phah doktor uba lah ban sumar ïa ki mrad bad ban khanglad ïa ka jingsaphriang une u khñiang jingpang ha ka shnong.
