SHILLONG:
Ka tnad jngoh kai pyrthei, ha ka 30 tarik Jylliew ka la pyllait paidbah ïa ki 16 tylli ki kali ban ïaid ban ïeng hapoh ka wat kaba nyngkong jong ka projek Prime Tourism Vehicles.
Haba kren ha kane ka prokram pyllait paidbah, U Myntri Rangbah u Conrad K Sangma u la ong ba ka leit ka wan ha ka tnad jngoh kai pyrthei ka dei ka jingeh kaba khraw na ka bynta ka jylla Meghalaya, bad kumta ka jingmut ban wanrah ïa kiba kum kine ki kali ka dei na ka jingdonkam ba ki nongwan jngoh kai ki wan sha ka jylla.
U Sangma u la ïathuh ba ka sorkar ka thmu ban pyllait 50 tylli kiba kum kine ki kali ha kane ka snem (financial year), bad kumba 200-250 tylli kiba kum kine ki kali ha ki san snem ban wan.
“Ka dei shi bynta jong ka prokram kaba la shong pyrkhat bha, bad ka dei shi bynta jong ka jingthmu ban pynlong ïa ka Meghalaya ka jaka jngoh kai pyrthei kaba kongsan,” u la ong.
U Myntri Rangbah u la pynshai ruh ba ka rukom treikam jong ka sorkar ban jied ïa ki nongseng kam seng jam lajong, bad ban ïarap pisa ïa ki ha ka tnad jngoh kai pyrthei, ka long kaba shai.
Haba kren sha ki lad pathai khubor halor ka jingkynnoh ki nongseng kam seng jam ba la ai ïa ki skhim tang sha ki briew kiba ïajan bad ka sorkar, u Sangma u la ïathuh ba ki briew kiba la ïoh ïa ki jingïarap pisa bad ki jingkyrshan ki dei ki operator bad ki nongseng kam seng jam kiba don bynta ha ka tnad jngoh kai pyrthei.
“Kumta ki don ki briew kiba lah ban ong ïa kata, hynrei kum ka sorkar ngi kwah ïa ki skhim jong ngi ban long kiba ïarap. Ka jingmyntoi kan long khongpong lada ngi ai jingïarap tang ïa ki briew kiba jan bad ngi bad kyntait ïa kiwei, bad kam don jingmut eiei,” la ong u Sangma.
U Sangma, uba la pyllait paidbah ïa ki 16 tylli ki Prime Tourism Vehicles ha kajuh ka sngi, u la ïathuh ruh ba ka sorkar kan pynthikna ban ai ïa kiba kum kine ki kali sha ki nongseng kam seng jam lane ki operator kiba don hok ban ïoh ïa ki.
