NONGSTOIÑ:
U Deputy Commissioner jong ka West Khasi Hills District bad u ba dei ruh u District Election Officer u Bah Garod LSN Dykes, ha ka 5 tatik u Kyllalyngkot u la ïoh ban pyllait noh ïa ka jingpynmih kaba khatduh ïa ka electoral roll ha baroh lai tylli ki konstitwensi jong ka WKHD.
Ïa kane ka jingïalang la ïoh ban pynlong hapoh ka Conference Hall jong ka ophis u DC ha ka jingïadon ryngkat lang da ki RO, ERO, ADC election, ki nongmihkhmat na ki seng saiñpyrthei bapher bapher ha kaba u DEO u la ïoh ruh ban sam ruh ïa kitei ki electoral roll sha kiba wan mihkhmat na ki seng saiñ pyrthei.
Haba ai jingkren ha kane ka jingïalang u Bah Garod u la ai ka jingïaroh ïa ka tnad election kaba la trei shitom bad aiti lut ban lum jingtip bad ban pynbit pynbiang ïa ka electoral roll bad u la pynbna ruh ba katkum ka special summary kidon haduh 8324 tylli ki phom bala ïoh pdiang, 123102 ngut ki nongthep vote na baroh lai tylli ki konstitwensi bad 5 tylli ki polling station thymmai kiba kynthup ïa ka Nongkhniang, Lyngdoh Mukyllain, Pyndengrei Dommawlein, Nongkynjang and Riangpoit.
U la kyrpad ruh ïa baroh kiba ïadei bad kane ka kam naduh ki nongïalam seng saiñ pyrthei ba kin kner ïa la ka kti ban ai jingïarap khnang ba ki kam ki jam kin ïaid beit ïaid ryntih bad khamtam ïa ki khynnah samla kiba la kynjoh 18 snem karta ba kin ïoh pynrung kyrteng ha ka Electoral Rolls bad u la kyntu ruh ïa ki seng saiñ pyrthei ban kin ïai pynneh ïa ka burom jong ka District ha kane ka Election ban wan.
