SHILLONG:
Ka Seng Khasi Kmie, Mawkhar Shillong, ha ka 22 tarik Lber ka la pyndep ïa ka bynta ba kongsan shwa ban kan pynkhreh pynkhrum ban pynlong ïa ka Shad Suk Mynsiem ha ka 8, 9 bad 10 tarik u Ïaïong, 2023 da kaba ka la lah ha kaban pyndep ïa ka nguh ka dem ka khnong ka bishar naka bynta ka Kiew Ksing.
Ka Kiew Ksing, ka dei ka byrta ka shula ne ka jingpynbna ïar sha ki parakur parakha ka Bri Hynñiewtrep Hynñiew Skum ba ka por ka samoi ban pynlong ïaka shad ban ai nguh ai dem ïa U Blei Trai Kynrad kane ka la poi, naka bynta ban khreh ban sei ïa ki riam ka beit ka ksiar ka rupa naka bynta ban ïoh ha kaban pynriam ïa la ki nongshad kynthei bad shynrang, khnang ba kin ïoh ban ïa mih lympung bad ban shad hun bad palei ka mynsiem.
Haba phai sha ka Kiew Ksing, ïa ka jingïalang baroh kawei la pynïaid ïa ka da u Bah Rangpher Rynjah dkhot JPK, la ïoh ïa ka jingkren maitphang na u Bah O. Pyngrope Vice President ka Seng Khasi Kmie.
Hadien kane, ka kynhun u Tymmen U San Seng Khasi Kmie hapoh ka jingïalam u Vice Chairman u Bah Donbokstar Kurkalang, u la leit sha ka nguh ka dem ka khnong ka bishar, da ka lengbah ka lengsan, u khaw eh u khaw khieñ, ban khmih ïa kita ki dak ki shin ban ïa pan na U Blei Trai Kynrad ba naduh ka ka sngi ba la pynkhreh, ba ki kam ki jam kin da ïaid beit kin da ïaid ryntih, ba ka shad ka kmen kan da phuh kan da phieng, ba u duhalia un da ïoh ïa ka buit ka bor ba un lah ha kaban tem ban put khlem da shoh thait shoh jrem, pynban ba ka sur jong ka ksing, ka tangmuri ka kynshaw kin da sawa da ka sur ba bang ba thiang, kaban pynshoh ïa ka met ka phad ïa ki rang bad ki thei sotti haba ki mih ban iuh kjat ban shad ha lympung.
U Tymmen U San u da ieng ruh ban ïa said ïa thew ha khmat u Blei Trai Kynrad ba un ri un sumar un sukher, ba ïoh don kein ka sabuit ka sakai, u apthap, ki nong bishni ki nong pihuin, kiba thew bad sylla narud nakiar, ba ïa kum kine ki jingmut ba sniew bym lah ban ïohsngew da la ki jong ki shkor ne ban ïohi da la ki jong ki khmat, U Blei Trai Kynrad hi un pynthiah lyngdang pynthiah pyllup ïa kum kine kiei kiei baroh.
Hadien kane nguh ka dem ka peit dak ka peit shin bad haba la biang lut nadong shadong, ki Duhalia ki la sdang ban tem ïa ka ksing lumpaid bad bynrap lang da ka jingtem sa ïa kiwei pat ki skit kiba don baroh 7 tylli.
Ïa ki kyntien ai khublei la ïoh na u Cultural Secretary Seng Khasi Kmie u Bah Hammar Sing Kharhmar.
Naduh kane ka sngi ba la pynkiew ïa ka ksing, man la ka janmiet, kan don ka jingtem ïa ka ksing bad ruh ban hikai shad ïa ki khynnah, ki samla kynthei bad shynrang, ha Seng Khasi Hall, kaban ïai bteng haduh ka janmiet jong ka 7 tarik U Ïaïong kaba long shi sngi shwa jong ka Shad Nohkjat kaban long haka 8 tarik.
