SHILLONG:
Ka Election Commission of India (ECI) ha ka 13 tarik Kyllalyngkot ka la pynksan ïa ka jingpynbna jingai sngewbha (Freebies) jong ki seng saiñ pyrthei ha ka jylla, da ka ba ong ba kam dei satia ka jingpynkheiñ ïa ki aiñ jong ka Ri India bad kawei ruh ka Model Code of Conduct kam pat treikam satia namar bym pat pynbna ïa ka tarik elekshon.
Lah ban kdew hangne ba kane ka long hadien ba la buh ïa ka jingkylli halor ka jingpyntreikam ka Sorkar MDA ba ïalam da ka NPP ïa ka skhim FOCUS bad FOCUS+ bad halor ka jingwanrah ka All India Trinamool Congress (AITC) ïa ka skim WE-Card bad MYE-Scheme.
U Chief Election Commissioner (CEC) u Rajiv Kumar u la kdew, “ki skim, kum ka WE Card bad MYE Scheme ba la wanrah da ka AITC ki dei ki jingkular, bad kim pynkheiñ ïa ki aiñ namar ka dei ka rukom ha ka elekshon ban ai ki jingkular sha ki nongthep vote bad ka dei ruh ka hok jong ki nongthep vote ban tip bad bishar ïa ki jingkular”.
U la bynrap shuh shuh, “ki seng saiñ pyrthei kiba khlei ïa ki jingkular sha ki nongthep vote, ka dei ka hok jong ki bad ka dei ruh ka hok ki nongthep vote ban tip bad ban bishar ïa kane ka jingkular jong ki”.
U Kumar ula ong ruh ba mynta ka jingïatai hapoh ka Ri ka dang ïaid halor kine ki jingai sngewbha (freebies) jong ki seng saiñ pyrthei hynrei ka ECI kam lah ban khang ïa kine ki jingkular, namar ba ka Model Code of Conduct (MCC) kam pat treikam satia.
Haba ïadei bad ki jingkynnoh ba ka NPP kam shym la lah ban ai ïa ki jingkheiñ halor ka jingpynlut ha ka elekshon ba la dep, u Kumar u la ïathuh ba ka NPP ka la dep ban ai jingkheiñ wat la ka la pynslem ban ai jingkheiñ.
Halor ka jingkynnoh ïa u Myntri Sorkar ba u la sam pisa sha ki paidbah ka Nongkrem, u Kumar ula pynpaw ba ym don jingtip eiei halor kane ka jingujor hynrei haba wan kino kino ki jingujor sha ka ECI, ka ECI ka ju bthah shuwa ïa baroh ki DEO ba kin rejister bha ïa baroh ki jingujor bad sa leh ïa kaba donkam.
