MAWKYRWAT:
Ka Dorbar Shnong Rangthong, South West Khasi Hills District ha ka 25 tarik u Naiwieng 2022 ka la pynkup burom ïa ka kong Victorealness Syiemlieh kaba la wanrah nam wanrah burom ïa ka jylla bad ia ka shnong baroh kawei lyngba ka jingïoh pdiang ia ka Florence Nightingale Award 2021 na ka President ka ri India ka Droepadi Murmu ha ka 7 tarik u Naiwieng ha Rashtrapati Bhawan ha Nongbah Delhi.
Kum ban shu kdew ka Kong Victorealness ka dei ruh ka kyrtong ka seng Congress ban sa ïakhun ïa ka MLA elekshon ha u 2023 na Ranikor Constituency bad ka jingïoh pdiang ïa katei ka khusnam ka dei halor ka jinglah jong ka ban ai ïa ka jingshakri ïa ki briew ha ka koit ka khiah ne ha ka imlang sahlang. Ka kong Victorelness kaba dei ka nurse ka dei ruh kaba la shongthait na ka kam Assistant Director jong ki nurse hapoh ka Directorate ka Health Service Shillong bad ka dei ruh ka longkmie kaba ju iakit ia bha ha ka imlang sahlang bad kaba la long teng ka nongkitkam ka jingiaseng kynthei naduh ka Balang Rangthong, Presbytery bad haduh ka Synod.
Ha kane ka sngi nalor ka jingpynkup burom ka shnong, la pynkup burom ia ka kong Victorealness da ki seng bapher bapher kiba kynthup naduh ka RCCSA, VDP, RVWWO bad ka Village Organisation kiba la pynpaw ia ka jingsngew burom bad sngewnguh bad ai ruh ka jingkitbiok kitrwiang ia kane ka longkmie.
Ha kane ka sngi pynkup burom la pynwai ia ka jingialang da ka jingrwai pynwai na u Kitborlang Nongrem uba dei Myntri Shnong bad jingduwai pynwai na ka kong Ninety Milian Shangdiar.
