MAWKYRWAT:
Ha ka 10 tarik u Ïaïong 2023 ka party UDP jong ka Nongjri Zone jong ka Ranikor Konstitwensi ka la ïoh ban pynkup burom ïa u Bah Pius Marweiñ MLA bad MDC ka Ranikor Konstitwensi hadien ba u la jop arsien kynthih kum u MLA na ka party UDP na ka Ranikor Konstitwensi, South West Khasi Hills District.
Ha kane ka sngi ka la long shisha kaba i shongkun lyngba ka jingai sngewbha da kaba pynkup burom da ki jaiñ ryndia bad ruh la ai sngewbha ruh da ki Momento ïa u Bah Pius Marweiñ MLA bad MDC ka Ranikor Konstitwensi da ki ba ha ïing ha sem, ki kmie kha bad kumjuh ruh na ka ka party UDP kiba kynthup na duh ki Circle, Zone bad ki Unit bapher bapher bad ki nongkyrshan naka party UDP jong ka Ranikor Konstitwensi.
U Bah Pius haba kren ha kane ka sngi, u la ai khublei ïa baroh ki nong kyrshan jong ka party napoh ka Ranikor Konstitwensi kiba la pynjop donburom biang kum u MLA ha u snem 2023.
Haba kren ha kane ka sngi, u Bah Pius Marwein u la ong ruh ba kine kiei kiei baroh ki dei ka jingbtin bad ki jingkyrkhu u Blei ba najrong. Ha kane ka sngi u la ïathuh lyngkot ruh ïaka jingim jong u naduh ba u dangrit ka rta ha kaba u la ong ba ha ka jingim jong u lada u thmu ïa kano kano ka kam naka bynta ka jingbha kam ju leh noh ei u poi beit ha ka thong namar kata u pynpaw ka jingsngewnguh ïa u Blei nongbuh nongthaw ba u la kyrkhu ïa u katne ba u la long mynta, bad kumjuh ruh ïa ki paidbah kiba la shim biang ïaka rai ba un jop biang sa ha kane ka kynti ba mynta, kata naduh ka by-election jong u snem 2018 bad kumjuh ruh mynta u snem 2023.
Nalor u Bah Pius Marwein la ïoh ruh ka jingkren na u Bah G.G. Bung Snaitang bad na u Bah C. Nomgbri Working President jong ka UDP Ranikor Circle ha kaba ki la ong ba ka Ranikor Konstitwensi ka long ka konstitwensi kaba stad ha kaba ha kine ki 50 snem ba la dep ki la jied ïa ki nongmihkhmat kiba stad ban ïoh ïa ai bynta lem na ki wei pat ki jaitbynriew namar ba ka Ranikor Konstitwensi ka dei ka wei ka Konstitwensi kaba don khleh jaitbynriew kiba kynthup ïa ki jait bynriew Hajong, Garo, Khasi bad kiwei de. Hynrei, kim shym la don kano kano ka jingsngew jaidbynriew bad ki ïa im suk imsaiñ da kaba ïa tylli lang baroh. Ki la pynpaw ruh ka jing sngewnguh ïa u Bah Pius Marwein u MLA ka Ranikor namar ba u long u briew u ba stad bad u long u ba lah ban pyn ïa tylli ïa baroh ki jaid bynriew ha kane ka konstitwensi.
Shuh shuh ki la ai nuksa ruh ba ka jinglong jong u kum u nong mihkhmat, ka dei ruh ka wei ka bynta ba u Blei u la ibit ïa u. Bunsien ki nomgshynshar ha ka pyrthei kiba trei hok ki dei hi kiba mih na ki long ïing ki ba duk da kaba u la ai nuksa ïa u Barak Obama bad ïa u Abraham Lincoln kiba la long ki nong synshar kiba khraw ïa ka America.
Ïa kane ka jingïalang paidbah kila pynlong ha madan shnong Nonghyllam, South West Khasi Hills District ha ryngkat da ka jing ïa donlang u Bah G.G. Bung Snaitang president jong ka UDP Ranikor Circle, Bah C.Nongbri working president ka UDP Ranikor ki wei de ki riew rangbah shnong bad ki paidbah na kylleng ki shnong napoh ka Ranikor Konstitwensi kiba la wan ban sakhi lang ha kane ka sngi bad la pynshit pynshngaiñ shuh shuh ha kane ka sngi da ki jing rwai bad ki jing shad tynrai na kane ka dong ka thaiñ Ranikor.
