SHILLONG:
Kum shi bynta ka jingïakren pynbeit pud ha ka wat kaba ar, la pynlong ïa ka jingïalang jong ka Joint Regional Committee hapdeng ka Meghalaya bad ka Assam, na ka bynta ki jaka ba don ha ka jingïakajia ha ka thaiñ Jaiñtia Hills, mynta ka sngi ka 14 tarik Jylliew ha State Convention Centre ha Shillong.
La pynïaid ïa ka jingïalang da u Symbud Myntri Rangbah ka Meghalaya u Bah Sniawbhalang Dhar bad u Myntri ka sorkar Assam u Piyush Hazarika.
Haba kren sha ki lad pathai khubor hadien ka jingïalang, u Bah Sniawbhalang u la ong ba baroh ar ki komiti kin sdang ban treikam na ka bynta ka jingïakren pynbeit pud jong ka wat kaba ar kaban long shen.
“Ha ki sngi ban wan, ki dkhot na baroh ar liang kin sdang ban leit sha ki jaka bad ban ai ïa ka kaiphod hapoh ki khyndiat bnai,” la ong u Symbud Myntri Rangbah.
U la ong ruh ba ka regional committee ka lah ban ai ïa ka kaiphod sha ka sorkar jylla hashwa u bnai Nailar, bad ba ka jingleit jngoh kan sdang hapoh ka taïew ba khatduh jong une u bnai lane ha u bnai Nailar.
Ha kawei pat ka liang, u Hazarika u la ong ba kam don kano kano ka jingpynwit na ka liang ka Assam, bad ba baroh ar liang kin pyrshang ban pynbeit ïa ka mat halor u pud u sam da ka jingïasngewthuh jingmut.
“Ngim don kano kano ka jingeh bad ka Meghalaya, bad ngi burom ïa ki paidbah jong ka jylla. Kaei kaei kaba jia ha khappud la leh da ki runar ki bym dei na Assam,” u la ong.
U Hazarika u la pynpaw ruh ka jingkyrmen ba ka mat kaba la sahteng la slem halor u pud u sam yn lah ban pynbeit hapoh ka por kaba lyngkot da ka jingïatreilang.
