NONGPOH:
U MLA ka United Democratic Party (UDP) na Nongpoh, u Bah Mayralborn Syiem, ha ka 1 tarik Jylliew u la pynlong ïa ka jingïatai paidbah ïa ka mat halor ka Reservation Policy, ha kaba la ïohi ïa ka jingwan ïashim bynta jong ki nongshong shnong ka Nongpoh bad kiwei ki bynta jong ka Ri Bhoi district.
Ha kane ka jingïalang kaba la pynlong ha Sajer Community Hall, Nongpoh, la wan ïashim bynta ki nongïalam ka UDP na Ri Bhoi, u MDC ka Nongpoh konstitwensi u Bah Balajied Ranee, u President ka Ri Bhoi Dorbar u Bah RB Shadap bad kiwei.
Haba kren ha kane ka jingïalang u Bah Mayralborn u la ong, “Kane ka jingïalang ka dei tang ka jingïaphylliew jingmut ha kaba ngi lah ban pynpaw ïa ki jingmut bad ki jingai jingmut jong ngi ha kaba ïadei bad ka Reservation Policy ha ka thung kam thung jam ha ka jylla, kaba dei ka mat kaba khluit bha ha ka jylla mynta.”
U Bah Mayralborn u la ïathuh ruh sha ki paidbah ba la ai ka jingpyntip halor ka komiti jong ki stad ban khmih biang bad ban pule ïa ka policy, bad u la ong ruh ba la bthah ïa ki dkhot jong ki seng saiñ pyrthei baroh ban ai ïa ka jingpynksan jong ki katkum ka aiñ halor kane ka mat – kam pher la ki kyrshan ne ki pyrshah ïa ka jingdawa ban khmih biang ïa ka reservation policy.
Ha kane ka jingïalang paidbah, ki nongwab shim bynta ki la kylli shibun ki jingkylli bad ki jingbymshai halor ka policy bad ki la kyntu ïa u MLA ka thaiñ ban rah ïa kane ka mat ha ka Ïingdorbar thawaiñ.
Uwei na ki nongkren u la ong, “Lada ka 40:40:15:5 policy kaba don mynta, ka dang neh, kim don kano kano ka jingsngewpher, hynrei la dei ban pyntreikam ïa ka roster da kaba peit sha khmat. Lada ki ïai bteng ban pyndap ïa ki backlog naduh u snem 1972, kin ym don shuh ki kam ba lait na ka bynta ki Khasi bad Jaiñtia.”
Uwei pat u nongkren ha kane ka sngi u la ong, “Ka jingïakhih ba la pynïaid da ka Voice of the People Party (VPP) kam dei ka mat jingeh tang jong ka Ri Bhoi marwei hynrei jong ka jaitbynriew Khasi baroh kawei, ngin ïashnoh kti lang bad ngin long kawei khnang ba ngin jop ïa ka thong ka jong ngi.”
Kumjuh ruh, na ka liang u Bah RB Shadap u la kren shaphang ka rukom pynrung ïa ka roster system bad ka jingjia bym sngewtynnad ki ban sa mih hapdeng ki Khasi bad ki Pnar lada pyntreikam da kaba phai shadien.
Shuh shuh, u nongpynïaid ka Seng Samla Shnong Ri Bhoi u la ong, “Ka Reservation Policy kam dei ban wanrah jingïapher jaitbynriew hapdeng ki Khasi bad ki Garo. Baroh ar jaitbynriew ki dei ban lah ban sei ïa ka jingai jingmut bad jingsngew jong ki. Kan ym dei ban don ka jingïashrut pher jaitbynriew hapdeng jong ngi.”
Haba pynpaw ïa ka jingsngewnguh, u Bah Myralborn u la ong, “Kane ka dei ka sur jong ki paidbah na Nongpoh bad Ri Bhoi bad ngan sa rah ïa ki jingai jingmut jong phi ha ka Ïing Dorbar Thaw Aiñ. Ngi ïa mynjur halor ka jingkhmih biang ïa ka reservation policy. Hynrei ai ngan maham lupa – Wat shah ïalam bakla da ka jingsngew namar kane ka dei ka jingïaleh da jong ka jingstad ym jong ka jingsngew,” la ong u MLA ka Nongpoh konstitwensi.
Haba ai jinkren sha ki lad pathai khubor hadien ka jingïalang, u Bah Mayralborn u la ïathuh ba kum kine ki jait jingïalang kan sa don ha ki bynta bapher bapher jong ka Nongpoh bad Ri Bhoi distrik, khnang ban sngewthuh ïa ka rukom pyrkhat jong ki paidbah ban dup lah pat ban rah ïa ki jingai jingmut jong ki paidbah sha ka sorkar.
“Ngin sa shong jingïalang ruh bad kiwei ki nongmihkhmat na kiwei pat ki konstitwensi ha Ri Bhoi, kynthup ruh ïa ki MDC, MLA, ki nongïalam seng treimon sngewbha bad ki dorbar ha Ri Bhoi,” u la bynrap.
