SHILLONG:
Ka Hynñiewtrep National Youth Movement (HNYM) ha ka 25 tarik Kyllalyngkot, ka la pynshai paidbah halor ka jingdawa ka seng na ka Khasi Hills Autonomous District Council (KHADC) ban weng noh ïa u Acting Syiem ka Hima Mylliem u Bah Ainam Syiem bad ïa u Syiem ka Raid Marwet u Bah Kynsing Syiem.
Haba kren sha ki lad pathai khubor, u President ka HNYM u Bah Louis Dohtdong u la ïathuh ba u Executive Member ka Elaka u la khot ïa u Acting Syiem ka Hima Mylliem bad ïa u Syiem ka Raid Marwet ban pynshai halor ka jingdawa ka seng HNYM ban weng noh ïa ki.
U Bah Dohtdong u la ïathuh ruh ba ka seng ka la ïohpdiang ïa ka shithi ha ka 20 tarik Kyllalyngkot 2023 halor ka kam Circle Rangbah Shnong ha Raid Marwet, Mylliem Syiemship. U la ïathuh ruh ba ka Hima Mylliem ryngkat ka KHADC ka la rai ban buh noh ïa u Circle Rangbah Shnong lane da u Area Rangbah Shnong ha ki jaka ba shong shnong ki Garo kiba don kumba 58 tylli ki shnong.
Ha ka jingïadei bad ka jingweng noh ïa ki kyntien “nongpyniaid shnong” na ka Mylliem Act, 2007, u Bah Dohtdong u la ïathuh ba ka Hima Mylliem ryngkat u EM Elaka ki la mynjur ban weng noh ïa kine ki kyntien ban ban bsuh noh da ki kyntien “Circle Rangbah Shnong” ha kane ka Aiñ.
Kumta u Bah Dohtdong u la pynpaw ka jingsngewnguh ïa ka Hima Mylliem bad ka District Council kiba la shimkhia ban peit ïa ka jingbha jong ki it ki hima jong ka jaidbynriew.
Shuh shuh u Bah Dohtdong u la ïathuh ruh ba ka Hima Mylliem, lyngba u Acting Syiem ka Hima, ka la phah da ka jingthoh sha u Deputy Commissioner (Revenue) ka Ri Bhoi ba kim dei shuh ban pdiang ïa kano kano ka NOC ha kaba ïadei bad ki kam khyndew kam shyiap ha ka jingïadie ïathied ïa ki jaka kiba hap hapoh ka Hima sha kiwei pat ki jaidbynriew.
Ha kawei pat ka liang, u Bah Dohtdong u la kynthoh ruh ba ka jingleh donbor kiwei ki jaidbynriew ka long namar ka jingkulmar ka Mylliem Act, kaba ka District Council kam shym la shim khia ban shna ïa ki aiñ ki kanun ban pynbha ïa ka Hima Mylliem. U la kynthoh ruh ba kumba 70% na ka Mylliem Act ka la phiel namar ka jingbym peit bniah ka District Council kaba long ka nongshna ïa kine ki aiñ.
Halor kane, u Bah Dohtdong u la ong ba ka jingma ka long ba ki MDC kim don por ban ïatai ïa ki jingeh ka Hima Mylliem. U la ong ruh ba ka jingshim khia ka seng halor ka Hima Mylliem ka long namar ba ka Hima Mylliem ka long kum ka dohnud jong ka jaidbynriew Khasi. U la ong ruh ba lada lah ban pynbha ïa ka Hima Mylliem, kiwei kiwei ki Hima ruh ki beit.
U la kynthoh ruh ba ka jingjyllei jong ki poi ei, ki mynder ri ha Ïewduh ban ïoh ban kamai kajih ka dei namar ka jingpheil ka Mylliem Act.
U Bah Dohtdong u la ong ruh ba ka Hima Mylliem ka dei ka Hima kaba bun jingmih tam napdeng ki Hima baroh khoit bad u la kynthoh ba ki MDC ki pynlong ïa ka Hima Mylliem tang kum ka ATM ban kamai spah. U la kynthoh ruh ba dei na kane ka daw ka Hima Mylliem haduh mynta kam don ïa ka Dorbar Hima ka ban ai jingkheiñ jingdiah sha ki paidbah bad kam don ruh ïa ka mang tyngka (budget) jong ka Hima.
U Bah Dohtdong u la ong ruh ba ki paidbah ki donkam ban tip ïa ka jingmih ha ka Hima Mylliem bad u la kynthoh ruh ïa ka jingbym don bynta ki Syiem Raid, ki Lyngdoh Raid bad ki Basan ha ka Dorbar Hima. U la ong ruh ba ka jingbym ïaid beit ha ka synshar khaddar ha ka Hima Mylliem ka long namar ba la pynïaid ïa ka Hima tang da ki 11 ngut ki Myntri ryngkat bad u Syiem wat haba ki don 48 ngut ki Myntri.
U Bah Dohtdong u la kynthoh ruh ïa ki MDC kiba ju kren ieid jaidbynriew hynrei kim treh ban kren halor kane ka mat hapoh District Council namar kane ka long ka lad ba kin kamai spah khnang ba ki lah ban pynlang pisa ban ïakhun MLA.
