NONGSTOIÑ:
Kum shi bynta ban ai jingkyrshan ïa ka jingïakhih u President ka Voice of the People Party (VPP) u Bah Ardent Miller Basaiawmoit, uba shong shah thngan khlem buh por ban dawa na ka sorkar ba kan pynbeit thymmai noh ïa ka reservation policy, ki samla ka thaiñ Rambrai mynta ka sngi ka 27 tarik Jymmang ki la pynlong da ka signature campaign ha ïew Rambrai.
Kane ka signature campaign ka long ruh kum ka dak ban ai mynsiem ïa u Bah Ardent watla kim ïoh ka lad ban poi ha ka jaka shong shah thngan jong u ha nongbah Shillong ha kaba ki la pynpaw ba ki sngewdei ban ai jingkyrshan ym ïa u briew hynrei khamtam ïa ka mat kaba u ïeng na ka bynta ka jaitbynriew.
La sakhi ruh ba kiba bun ki samla ka thaiñ Rambrai ki la wan ban ïashim bynta ha kane ka signature campaign ban pyni ïa ka dak ba ki kwah ba ka sorkar kan sngap ïa ki jingdawa u paidbah ka Ri Khasi Jaiñtia.
