SHILLONG:
Ka seng Hynñiewtrep Youth Council (HYC) hadien ka jinglap ïa ka RTI ka la kam ba ka sorkar Meghalaya Democratic Alliance (MDA) ka la shu pynsepei ïa ka pisa kaba T.4 klur da kaba thung ïa ki Chaiman ki Co-Chairman, Vice-Chairman, Deputy Chairman bad kiwei, ki long ki bym wan rah jingmyntoi ei ei wat tang ki committee ruh kim ju ïa shong tang shisien ruh.
Haba kren sha ki lad pathai khubor u General Secretary ka HYC u Bah Roykupar Synrem u la ïathuh ba ha u Ïaïong ka sorkar jylla ka la thung kumba 21 ngut ki MLA, ki Ex-MLA, ki nongtrei jong ki party bapher bapher kum ki Chairman, Co-Chairman bad kiwei. U la ïathuh ba mynta ka sngi na ka liang ka sorkar ka la thung sa kumba 6 ngut, kynthup ïa 2 ngut ki Ex-MLA bad 4 ngut kiba dei ki nongkitkam hapoh jong kane ka sorkar.
U Bah Synrem u la ong ba hadien ba ka sorkar ka la dep thung kam ka hap ruh ban siew ïa ki. “Nalor kidei ki MLA ki Ex-MLA ki ïoh ïa ka baibam tymmen hap ban pynlut na ka pla tyngka jong u paidbah, kiba dei ki A+ ki ïoh kumba T.20 hajar shaneng naduh ka bill light, ka bai ïing bad kiwei kiwei bad tang uwei u Chairman ka sorkar ka lut da ki phew phew hajar”.
U Bah Synrem u la buh jingkylli ba hato kine kiba la thung ïa ki, ki la ai ne em ka jingshakri lane ka jingmyntoi sha ki paidbah ka jylla ha kine ki san snem kiba la dep. “Haba ïohi ïa ka jingkren jong u myntri rangbah ka jylla u Conrad Sangma ha ka Iing Dorbar Thawain ka jylla u ong ba u kwah ban ïohi ïa ka ïoh ka kot ka jylla kan poi sha ka 10 billion dollar Economically hynrei ha ka jingïohi pat ba ka jylla ka long bam hati kit kulai namar ka jingmih ka duna haduh katta katta”.
U la ïathuh ba na ka liang ka seng ka la ai da ka RTI jong baroh kine ki san snem kiba la leit ban lap ïa kata ka jingshisha la kine kiba la thung da ka sorkar jylla ka ai jingmyntoi ne em, “Ngi lap ba hapoh ka Planning Department ki don artylli ki Council lane ki Committee, kawei ka Meghalaya Development Economic Council kaba la khlieh da u MLA bad nalor u MLA don u Chairman lane ki Co-Chairman bad kiwei. Lada peit ïa kane ba ka kamram jong ka MEDC kadei ban ai jingmut sha ka sorkar kumno ban pynkiew ïa ka ïoh ka kot jong ka jylla. Ka long kaba sngewsih ka long ba ha ka jubab kaba ka la ïoh ba kane ka MEDC tang kawei ka Committee ka khlem shong jingïalang bad ïa ka pisa la shu siew ei bad pynsyrwa ei ïa ka pisa”.
Kaba ar pat kadei Meghalaya Resource and Employment Generation Council (MREGC), kaba mut ba kane kan ai jingmut ïa ka sorkar kumno ban pynïoh khajna bad kiwei kiwei na ka bynta ka jylla bad ban wanrah ka jingïohkam hapoh ka jylla hynrei kaba sngewsih ka long ba ha kine san snem ka long ruh kajuh ba wat tang kawei ka jingïalang ki khlem shong bad ki khlem ai jingmut ïa ka sorkar.
U la ong ba lada san snem la thung ïa kine ki council ban iarap ia ka sorkar hynrei la iohi ba ka jingai pisa la shu pynsyrwa kai tang na ka bynta ka jingpynhun iano re iano lane tang ban pynmyntoi elekshon jong no re jong no.
Na ka liang ka seng HYC ka la rai ban thoh da ka shithi sa u Myntri Rangbah ka jylla ban dawa ban peit ban leh ei ei bad ban pynthikna ba ka pisa paidbah ym dei ban pynsyrwa kai. Na ka liang ka seng ruh ka la ong ba lada donkam ban ai ka jingmut ruh ia ka sorkar kadei ban leh bad ban ai siew katkum ka jingleh ka jong ki.
