SHILLONG:
Ki nongseng kam lajong na kylleng ki jaka jong ka jylla Meghalaya ki dei kiba la wan ban ïashim bynta ha ka jingïalang jong ka Chief Minister Start-up bad Corporate Social Responsibility (CSR) kaba la pynlong na ka bynta lai sngi kynthih. U Myntri Rangbah ka jylla uba long u kongsan ha ka sngi kaba nyngkong u la pynpaw halor ka jingdonkam ba ïadei bad ka jingseng kam lajong bad kumno kane ka ïarap ban plie ka lad ïohkam ïohjam bad ka jingkyntiew ha ka liang ka ïoh ka kot ha ka jylla.
U trai jong ka Mel Food Processing, u la pynpaw ba watla kane ka kam, kam pat lah ban ai jingïarap hynrei kumno ka Prime ka dei kaba la don bynta kaba khraw ban ïarap ïa ki ha ka liang ka khaiï pateng.
“Ngi la don bynta ha ka jingshna waiñ mynta la phra snem, hynrei ngim ju kham kamai kumba ka paw bad long mynta. Ngi la kham shemphang bha mynta ka sngi bad ha une u snem ba la dep ngi la ïoh jinghikai halor ka jingpynïaid ïew, ka jingshna ban kham khring bad ka jingjied ha ka rukom kaba dei ban die ki mar bad lah ban pynïaid ïew”, u la ong.
Sa kawei de ka nongseng kam lajong ka Ayushi Beriwal, kaba la don bynta lang ha kane ka program jong ka Cohort 2.0 ka dei kaba la ai khublei ïa ka Prime halor ka jinglam lynti ba la ïarap ïa ka ha ka jingjied ban trei ka kam lajong. Ka Beriwal ka dei ka nongsdang bad nongseng ïa ka NE Greene Origins bad ka la trei ryngkat ryngkat bad ki nongrep jong ka jylla, bad suki suki ka la sdang ban kynduh bad treikam lang bad baroh ki nongrep jong ka Thaiñ Shatei Lam Mihngi.
Ka la ong, “nga ju phaikhmat sha ki i Pa ban ïoh mynsiem, nga dei ka engineer hashuwa ba ngan sdang ïa kane ka lynti bad trei pura por kum ka nongkhaiï. Nga la sdang da kaba die ïa u shynrai Lakadong bad u cashew kiba lah ban ïoh na Lakadong bad na Garo Hills.”
“Hynrei ka thong bad ki jingïoh jingmut ki la kylla mardor hadien ka PRIME, ka rukom song, bad ka jingai nam ai kyrteng. Nga la ïoh jinghikai ban pynbit pynbiang ka jingkheiñ jingdiah. Dei lyngba ka Prime ba nga ïoh ka lad ka lynti ban leit sha Bangkok bad Paris bad ka dei ka jingshem kaba sngewtynnad halor ka jinglah ban sakhi ka lynti ka lynti jong ka jingdon bynta ha ka kam khaiï pateng”.
