SHILLONG:
Ka Dorbar Shnong Khanduli, West Jaiñtia Hills District kala pynrem jur ïa ka jingkren laplah jong ka Deputy Commissioner (DC) ka West Karbi Anglong, halor ka jingkam khlem da tip ïa ka nongrim ba ka shnong Khaduli ka hap hapoh ka jylla Assam, hynrei ha ka jingshisha ka shnong Khanduli ka dang hap hapoh u pud u sam jong ka jylla Meghalaya.
Kane ka jingpynrem, ka long ba ha ka 19 tarik Ïaïong, 2023, ka Deputy Commissioner (DC) ka Krishna Baruah jong ka West Karbi Anglong ka la kam ba ka shnong Khanduli ka dang hap hapoh u pud u sam jong ka West Karbi Anglong District.
Ka Dorbar Shnong Khanduli ka la ong, “Lai sien lai wat, ngi kum ka shnong Khanduli ngi la pynmih ïa uwei u nongmihkhmat uba long u MDC jong ka Jaiñtia Hills Autonomous District Council (JHADC) bad shisien sha ka Ïing Dorbar Thawaiñ ka jylla Meghalaya uba la tip kum u Bah R. Kharshiing”.
Ki dkhot ka Dorbar Shnong Khanduli, ki la ïathuh ba kumba ka paw ba kham sharum ka Khanduli, ka don ka Mynih haduh Zero Point bad ki nongshong shnong ka Mynih ruh, kiba bun ka vote jongki ka don sha jylla Meghalaya, ka roi ka par ba bun, ki Anganwadi Centre ki don, ki skul kiba don bad ruh ka jingïoh ïa u khaw rashon ruh ki dang ïoh bad dang ïabam napoh ka jylla Meghalaya.
Kane ka jingkam jong kane ka DC Karbi Anglong, ka la shu kren laplah ba kat ka bor District ka dang kam ba ka shnong Khanduli ka dang hap hapoh Assam. Na ka liang ki nongshong shnong ka Khanduli ki la pynrem jur ïa ka jingkren jong kane ka DC bad ruh ïa ka Karbi Anglong Autonomous Council (KAAC) kala sieh biang ïaka signboard khrong khajna jong ka ha Khanduli.
Kane ka rai jong ka Dorbar Shnong kan sdang naduh lashai ka sngi Saitjaiñ naduh ka 4 baje mynstep, lada ka Karbi Anglong Autonomous Council (KAAC) kam weng ïa katei ka khyrdop lum khajna jong ka.
Shuh shuh na ka liang ki nongshong shnong ki la ïathuh ba ha kaba ïadei bad katei ka surok, kamdei ba shna ka Assam hynrei kadei ba la pyntrei da ka sorkar Meghalaya bad kham sharum ruh, ha kaba ïadei bad ka jingbun ïa ki Check Gate ruh ka dang hap hapoh ka jingpeit jong ka Meghalaya.