SHILLONG:
Ka seng Voice of the People Party (VPP), ha ka 17 tarik Jymmang ka la pynlong ïa ka jingïakhih shong kyllaiñ mongor ha ka jaka set kali ba don hajan ka Additional Secretariat,Shillong ban dawa pynsangeh shuwa ïa baroh ki jingpynrung kam katbym pat lah ban pynbeit ïa ka reservation policy hapoh ka jylla.
Ha kane ka sngi, la sakhi ïa ka jinglum jong ki paidbah ha kane ka jaka ha ryngkat ki placard ban dawa ïa ka mat kaba ki buh.
Shisngi hashuwa, u Myntri Rangbah ka jylla, u Conrad K Sangma u la pyntip ba kan don ka jingïalang jongbaroh ki seng saiñ pyrthei ha ka 19 tarik Jymmang ban ïakren halor kane ka mat.
Shuh shuh, u President ka seng Voice of the People Party (VPP), u Bah Ardent Miller Basaiawmoit haba u la tur ban lamkhmat ïa kane ka jingïakhih, u la ong ba ka mat jingeh ka long ban pynsahngeh shuwa ïa ka jingthep kam thep jam katba dang ïaid ka jingthmu pynbeit ïa ka reservation policy.
Kumban pynkynmaw, ha ka 12 tarik Jymmang, ka seng VPP ka la lum ha kane ka jaka shwa ban pynlong ka jingïaid paidbah sha Secretariat ban ai ïa ka dorkhas sha ka sorkar.
