SHILLONG:
Ki Waheh Chnong ka thaiñ Iooksi Saphai, ki la kyntait war halor ka jingmih khubor ba la pynmih da ka Synjuk Ki Waheh Chnong Ri Jaiñtia habaka ki la dawa bhah laka jong hakaba ïadei bad ka State Job Reservation Policy kata ka long 20% ïaki Jaiñtia.
Hakaba ïadei bad katei ka khubor, “Ngi kiba soi kyrteng harum , ngi kwah ban kren shai ba ngim don bynta eiei halor kane ka jingdawa katei ka Synjuk, bad ngi kwah ban kren shai ba ngi naka Liang ki Waheh Chnong ka thaiñ Iooksi Saphai, ngi ai ka jingkyrshan kaba pura ïa u Bah Ardent M Basaiawmoit ha kaba ïadei bad ka jingdawa ban pynthymmai ( Review) ïaka State Job Reservation Policy”.
“Kane kamdei shuh ka por jong ka jingïa sngewpher thaiñ, ne ka jingïapharia iaka Jaitbynriew ,hynrei ka dei ka por jong ka jingïatylli naka bynta ban ïakhun ïaki jingeh jong ka Jaitbynriew. Ka kyrteng Jaiñtia kamdei ka kyrteng ka Jaitbynriew, hynrei ka dei tang ka kyrteng ka thaiñ, bad ngi dei ban sngewthuh ruh ba ha Jaiñtia la kynthup lang ïa baroh kiwei pat ki Jaitbynriew kum ki Biate , ki Karbi bad kiwei kiwei bad ngim lah ruh ban kyntait dalei lei ruh ïaki kum ki Nong Jaiñtia ba pura”, la pynpaw ki nongïalam jong ka Waheh Chnong ka thaiñ Iooksi Saphai.
Kine ki nongïalam ki la ong, “Ngi la mad ïaka jingshah pharia haki por ka sorkar Phareng ha kaba kila pyndonkam ïaka Divide and Rule Policy naka bynta ban pharia ïaka Jaitbynriew. Hynrei ka jingthmu jong u Phareng, kam lah ban pharia ïaka Jaitbynriew namar ngi don ïaka jingkhein kur kaba shkem bad kaba don nongrim namar ki Phareng kim lah ban pynïakhlad ïaka jingïadei kur hapdeng ki Chalam na Pnar, ki Shabong na Khynriam bad ki Mukhim na War, nangta ki Laloo na Pnar, ki Lamin na War bad ki Diengdoh na Khynriam ruh ki dang dei shikur, bun kiwei kiwei ki Kur kiba na kylleng ki thaiñ ka Bri U Hynniewtrep kiba dang ïadei shikur. Ym juh don koit ki kur na ki Jaitbynriew Biate kiba la shong la sah ha Jaiñtia Hills kiba dang ïadei shi kur bad ki Pnar, bad kumjuh ruh , ymjuh don koit ki kur naka Jaitbynriew Karbi, kiba dang ïadei shikur bad ki Bhoi wat la ki sah makna hapoh ka Ri Bhoi District. Kumta kum ka Jaitbynriew , ngim dei shuh ban pdiang ïaka jingshah pharia haki Nongwei nongar kiba thmu ban pynïapher hapdeng jong ngi kum ka Jaitbynriew”.
Kumta na ka liang ki Waheh Chnong ka thaiñ Iooksi Saphai, ki la kitbok kitrwiang ruh ïa u Bah Ardent Miller Basaiawmoit ba un nang ioh ïaka met kaba shait ba khlaiñ bad kumjuh ruh ïabaroh ki paidbah ka Bri U Hynniewtrep hi, kyrmen ba Kane ka jingdawa jong ka Jaitbynriew kan sa urlong khlempep shisien ka sngi daka jingdon ryngkat U Blei ïangi kum ka Jaitbynriew.
Kiba soi kyrteng kynthup U Bah Nangaibormi Sutnga Waheh Chnong Umdeinlin Iooksi, U Bah Leonard Rabon Waheh Chnong Iooksi Kyanmynsar, U Bah Gino Synnah Waheh Chnong Saphai, U Bah Clement Pala Waheh Chnong Iawthymmei, U Bah Watsing Papeng Waheh Chnong Nongryngkoh, U Bah Chesnal Manar Waheh Chnong Pohkseh, U Bah Siworning Sayoo Waheh Chnong Madanrwai, U Bah Histokrist Pachiang Waheh Chnong Iooksi Iapkhla, U Bah Kyrshan Chullet Waheh Chnong Priang Iooksi, U Bah Deilang Wahlang Waheh Chnong Sarhen bad U Bah Hamran Lyngdoh Waheh Chnong Iooksi Tongkiad.
Ha kawei pat ka liang, na ka liang ki Waheh Shnong jong ka thaiñ Narpuh kaba hap hapoh ka Ri Lum Jaiñtia, ki la ai ka jingkyrshan kaba pura ïa ka jingïakhih jong u Bah Ardent M. Basawmoit, na ka bynta ka ka jingdawa ban pynkylla ne pynthymmai noh ïa ka Reservation Policy (State Job Reservation Policy).
Kane ka jingkyrshan jong ki, ka long namar ka jingïakhih ka long kaba don nongrim na ka bynta ka jingbha jong ka lawei ki khun ki kti jong ngi hapoh ka bri u Hynniewtrep.
Ki la pynpaw ba lada long kumno kumno ruh, na ka Liang ka jong ki, kin ai ka jingkyrshan ba pura ïa u Bah Ardent nangne shakhmat, ha kaba ïadei bad kane ka bhah thung kam thung jam bad lada jia ban mih ïamih paitbah ruh ngin ïamih ha kano kano ka por.
Ha kaba ïadei bad ka jingdawa jong ka Synjuk Waheh Shnong Ri Jaiñtia, kaba mih hapoh Social Media, ka la ong, “Ngim don kano kano ka jingtip bad ngim don bynta hi ruh ban pharia ïa ka Jaitbynriew, hynrei ngi ïalong shitylli (kawei) kum kawei ka Jaitbynriew kaba ong, “Khynriam u Pnar u Bhoi u War, u dei u pait Khasi baiar”.
Kiba soi kyrteng kynthup u Bah Lasting Pala (Waheh Shnong Umkiang), u Bah Jenisal Pohkyrnu (Waheh Shnong Dona Skur), u Bah Love You Bareh (Waheh Shnong Pyrtakuna), u Bah Min Lamare (Waheh Shnong Kuliang ), u Bah Shri.Sharai Lamare ( Waheh Shnong Borsara), u Bah Edimon Lamare (Waheh Sonapyrdi), u Bah Fantin Pajat (Waheh Shnong Lumphyllut), u Bah Pynkhlaiñ Dhar (Waheh Shnong Ratacherra), u Bah Wol Tariang (Waheh Shnong Dona Umbluh), u Bah Robi Suchiang (Waheh Shnong Umstaiñ) bad u Bah Mit Dkhar (Waheh Shnong Lahalein).
