SHILLONG:
U MLA ka Mawkynrew konstitwensi, u Bah Banteidor Lyngdoh, u la aiti ïa ka ïing kaba u la synñiang pisa ban shna sha kawei ka longkmie kaba don ruh lai ngut ki khun kiba dang khynnah bad kaba shem jynjar, kaba sah ha ka shnong Maw u Sam.
Katei jingpynshna ïing da u MLA na ka bynta katei ka longkmie ka dei hadien ka jinglap jong u, ha ki bnai kiba la dep ïa ka jingjot palat ka ïing ba ka shong khamtam na ka bynta ki khun jong ka.
Haba kren ha kane ka sngi, u bah Banteidor Lyngdoh u la ong, “Kane ka dei ka sngi kaba kyrpang tam kaba ngi la ïoh ban leh, bad bun tylli ki ïing ngi la dep ban pynshna kum kine kiba ym shym la pynpaw pyrthei. Peit sha kato kawei ka ïing kaba ki sah, ynnai peit sha kane ka ïing ba la shna thymmai, haduh katno ki shem jingeh.”
“Nga isynei ban peit, nga pang ka dohnud namar ba u kpa u la khlad noh, ki khun lai ngut, ka ïing ha kaba ka kamra shet ja bad ka kamra thiah, ka don hajuh. Nga isynei bad nga sngewthuh ba hapoh ka konstitwensi jong ngi dang bun kiba long kumne,” u la ong.
“Ka long kyrpang noh ha kane ka ïing, namar u kpa uba trei shitom uba ju ksaid ban pynbiang bad um ju kwah ban pynsngewsih ïa la i lok bad ki khun. Hynrei ha ka jingjia ka bym poi pyrkhat, ha kaba u dang leit sha lum bad ki jingri jingdup hynrei u la shu ngam pynban ïalade,” la ïathuh u Bah Banteidor.
U la ong ba ki don bun tylli ki ïing kiba u la pynshna da kaba pynlut na ka tulop bad na pla lajong na ka bynta ki longïing kiba shem jynjar ha kylleng ka konstitwensi bad u la ong ba un dang ïai bteng ban leh ïa kum kine ki kam leh isynei na ka bynta kiba duk ba jynjar.
“Ngin leh aiu ka spah ka phew haba kut, haba ngi ïap na kane ka sla pyrthei ngi hap ban leit thylli, kam don jingmut hynrei ngi dei ban don ka mon ban ïarap,” u la ong.
U la bynrap ruh da kaba ong ba u la dep wat jingtip na man la ki shnong bad dang bun kiba dang donkam kum kane ka jingïarap. “Donbok ba U Blei Trai Kynrad un dang ibit bad ngin ïoh ban jop biang ha u snem 2023, na ka bynta kine ki ïing, kiba duk ngan ym pynshna shuh kumne hynrei ngan leh da kawei pat ka skhim kaba man ki jaka ngin shna da ki apartment ban ai na ka bynta ki bym lah ban thaw ïing thaw sem ïalade,” la ïathuh u Bah Banteidor.
“Nga ïohi ïa ka jingjynjar, nga ruh nga wan na ka longïing kaba duk bad ba jynjar, nga la shong ha khmat ka dpei bad la ïa pyrkhat kumno ban leh haduh katne eh ka jingjynjar; hynrei ngi phai sha U Blei ban isynei bad U Blei u sngap ïa ka jingduwai jong ngi,” u la ong.
Na ka liang u MLA u la kular ba un don ryngkat bad ka ïing ka sem bad ruh bad kiwei ki baduk ba kyrduh jong ka thaiñ, bad kino kino ki jingeh kiba ki ïakynduh un don ryngkat lang bad ki baroh.
“Phim dei ban duh jingkyrmen, ngin ïaidonryngkat bad phi, haba ngi trei ïa ka kam, ngi dei ban trei hok ba kan long ka jingkyrkhu na ka bynta kiba duk kiba jynjar,” u la ong.
Na ka liang kane ka longkmie ka la pynpaw ïa ka jingai khublei kyrpang ïa u MLA uba la phai khmat ban ïarap ïa ka, ha ka jingeh kaba ka don, da kaba ïathuh ruh ïa la ka jong ka jingshem jynjar.
“Ka jingjia ba kyndit, ha kaba u kpa u khlad noh sha um ban leit pynsum ïa u masi bad uwei na ki khun. U lyoh badum u la kah ïa ka ïing ka sem jong ngi,” ka la ong.
Ka la bynrap da kaba ong ba da ka jingkylluid mynsiem ka jong u MLA, u la kloi ban ïarap ïa ka riew kynthei. Ka kitbok kit rwiang ruh ba U Blei un dang theh ïa ki jingkyrkhu ba un dang lah ban trei na ka bynta kiba shem jynjar baroh.
La sakhi lang ïa kane ka sngi da ki bahaïing jong katei ka longkmie bad ki khun, ki nongïalam shnong, ki nongkitkam bad nongïatreilang bad u Bah Banteidor, ki dkhot bad bor pynïaid ka Balang Presbyterian Maw u Sam, kiba la ai jingrwai ainguh sha U Blei bad ki jingduwai.
