SHILLONG:
Ka tnad pulit jong ka jylla Meghalaya, ha ka 14 tarik Kyllalyngkot ki la pynlong ïa ka jingïalang ban pynskhem ïa ki Commando kynthei lane ki Meghashakti (the Women Commando Warriors SF-10) ha ka jingïalang ka ba la long madan jong ka 1st MLP Mawïong, Shillong.
Ka comondo kynthei lane ki Meghashati (the Women Commondo warriors SF-10 ), ki dei ki tnad ka ba nyngkong tam ha ka jylla bad ka ba ar ha ka Ri India baroh ka wei, ki Meghashakti ki dei ki pulit kynthei, na ki unit bapher bapher, ki ba la shah pyntbitkyrpang ha ka kyrdan Commondo.
Ha kane ka sngi la pynskhem ïa ki 52 ngut ki Commondo kynthei, kum ki Meghashakti, ha ka jingïalang ka ba la don ryngkat u Myntri rangbah ka jylla, u Conrad K Sangma kum u Kongsan, u Bah Lakhmen Rymbui kum u Symbud kongsan, u Dr L.R Bishnoi Director General of Police, ki heh pulit bad kiwei kiwei.
Ha ba kren ha kane ka sngi u Myntri rangbah ka jylla u la ong ba ka long ka sngi ka ban sah jingkynmaw ba ka jylla mynta ka sngi ka la ïoh ïa ki pulit kynthei Commondo ki ba nyngkong tam ha ka jylla bad ka ba ar jong ka ri India baroh kawei.
“Ka dei ka ‘Red Latter Day’ ïa ki kynthei ha ka inglang sahlang, ha ba ngi ong ïa ki commondo ka mut tang ïa ki shynrang hynrei ki kynthei ha ka jylla Meghalaya ki la pynpaw ba ka ne ka dei ka ba bakla, ki ba la pynmshisha ba ki lah ban ïakhun ïa kano kano ka jingeh ruh ka ba wan hakhmat jong ki”u la ong.
U Bah Lakhmen Rymbui, u la ong ba ki pulit ka Meghalaya, ki la ju pyni ïa ka jinglah jong ki ban ai ka jingshakri ka ba pura ïa ka jylla hi baroh ka wei bad mynta ka sngi ka dei ka sngi ban sah jingkynmaw namar ka jylla ka la ïoh ïa ki pulit kynthei Commondo ba nyngkong tam ha ka jylla.
U la ong ki Meghashakti ki dei ki nuksa na ka bynta ki samla kynthei ba kin mih shakhmat ban wan ban pynïasoh ïa lade sha ka tnad pulit bad ban ai ka jingshakri ba pura ïa ka jylla.
