SHILLONG:
Katto katne sngi hadien ba ar ngut ki nongïalam niam na Shillong ki la shah khang lynti ha Bihar katba ki dang don ha ka lynti ban leit sha ka lyngkha trei jong ka Balang, ka Hynñiewtrep Youth Council (HYC) ka la dawa na ka tnad kam pohïing ka Sorkar Pdeng ban pynthikna ïa ka jingshngaiñ jong ki kynhun niam bapher bapher ha kylleng ka Ri.
Ka HYC ka la ong ba kane ka jingjia ka long ka bym lah ban pdiang bad ka seng ka la kyntu ruh ïa ka sorkar Meghalaya ban buddien ïa kane ka jingjia ryngkat ka jylla Bihar khnang ban pynthikna ba ki riew runar kiba donkti ha kane ka jingjia kin shah pynshitom katkum ka aiñ.
Haba kren sha ki lad pathai khubor mynta ka sngi, u President ka HYC u Bah Robertjune Kharjahrin u la ong, “Ka riti synshar khadar ka Ri India ka shah ïa kino kino ki nongïalam niam ban leit na ka bynta ki kam niam. Ha ka jylla jong ngi, ngi don ka jingshong suk hapdeng ki jait niam baroh bad ngi kyrmen ba ïa kane kajuh ka mynsiem jong ka jingburom ïa baroh ki jait niam la pdiang ha kiwei pat ki bynta jong ka Ri.”
Shuh shuh, ka HYC ka la kyrpad ruh ïa ki nongshong shnong ka jylla ban ym leh eiei khlem da tip lut ïa ka jingjia naduh sdang haduh kut. “Teng teng haba jia ki jingjia kum kine, ngi ju leh khluit khlem da tip ïa ka jingjia naduh sdang haduh kut, bad teng teng la ju pynheh ruh ïa ka jingjia,” u la bynrap.
Ïa kane la kren hadien ka jingwan kynduh jong ka seng ïa u Chief Secretary u Bah D.P. Wallang ha Secretariat mynta ka sngi.
