SHILLONG:
U Chief Election Commissioner (CEC) u Rajiv Kumar u la ong ba ka jingthep vote ha ka jylla Meghalaya khamtam ha ki thaiñ khappud kan ïaid beit kumba ju long da ka jingshim khia ki heh ophiser bad ki DGP na ki ar jylla.
Haba kren bad ki lad pathai khubor u Rajiv Kumar u la ong kum shibynta ban pynthikna ïa ka jingïaid beit ïaid ryntih ka jingthep vote ha ka thaiñ khappud la aiti ïa ki ophisar bad ki DGP jong ki ar Jylla ka Meghalaya bad Assam ban pynthikna ba ki nongshong shnong kim dei ban shah pyndik ha ka jingleit ban thep vote.
“Baroh ki ophisar na ki District jong ki ar jylla ki la don ïa ka jingïakren kaba sani bha, ban pynthikna ïa ka suk ka saiñ na ka bynta ki nongshong shnong ha ki thaiñ khappud”, la ong u Kumar.
U Rajiv Kumar u la ong, “Ka jylla Meghalaya ka dei ka jylla kaba shongsuk shong saiñ bad ïa ka elekshon la ju pynlong kum ka jingleh tamasa jong ka riti synshar paidbah kumta, nga buh ka jingkyrpad ïa ki nongshong shnong ha ka jylla ba kim wan ban ïa shim bynta shit rhem ha kane ka elekshon ban wan”.
Ka kynhun ka ECI ka la ïakynduh ruh ïa ki nongïalam jong ki seng saiñpyrthei, ki heh ophiser kiba kynthup ïa u Chief Secretary, u Director General of Police (DGP), ki District Magistrate, ki Superintendent of Police, ki Ophisar ka jylla bad kiwei kiwei.
U la ong ba ka ECI ka la dep ban shong ruh ïa ka jingïalang, ban ïatai bniah bad ki Enforcement Agency ba kynthup ïa ka Excise, GST, Revenue Intelligence, Income Tax, Enforcement Directorate, Airport Authority, Reserve Bank of India, Narcotics, Railways bad kiwei kiwei.
U la pyntip “Ka jingpynlong ïa ka jingïalang bad ki bor ba dei khmih ïa kine ka long ban shim ïa ka jingïatreilang bad kumjuh ban pynthikna ba ka elekshon kan lait na ki jingpynngop”.
Lah ban kdew hangne ba ka Electoral Roll ha ka 5 tarik K’lyngkot 2023, ka la pynmih ïa ka kaiphot ba palat 21.61 lak ngut ki nongthep vote ki la pynrung kyrteng , ki jaka thep vote kin don 3482 tylli ha baroh ki 60 tylli ki konstitwensi.