SHILLONG
U nongaiktien jong ka North East Indigenous People’s Forum, u Bah Dundee Cliff Khongsit, u la ong ba kane ka seng ka sngew ba ka kyntien “Bharat” ka wan na ka ktien Sanskrit kaba don ka jingiadei bad ka jingngeit Hindi. “Ngi sngew ba kane ka dei ka jingpyrshang ban khniot ia kiwei ki jingngeit jong kiwei ki niam ha kane ka ri”, la ong u Bah Khongsit.
Une u nongaiktien jong kane ka seng u la ong ba ka India ka dei ka ri kaba don bun bah ki riti ki dustur bad ki jingngeit bapher bapher bad ka jingpynkylla ia ka kyrteng India sha ka Bharat kan pynkylla khongpong ia ka jinglong kyrpang jong ka ri.
U la ong ruh ba kane ka seng ka la shim ia ka rai ba kan pyrshah ia ka jingpyntreikam ia ka Uniform Civil Code (UCC) ha Meghalaya bad ha ka Dong Shatei Lam Mihngi. U la ong ba ka jingleh jong ka Sorkar Pdeng kan ktah ia ka riti ka dutur bad bad kwei ki nongkynti jong ki jaitbynriew bakyrpang jong ka Dong Shatei Lam Mihngi.
